MANILA, Philippines – Nalampasan ng atake sa puso ang tuberculosis bilang pangunahing sanhi ng pagkamatay ng mga preso o persons deprived of liberty (PDLs), ayon sa Bureau of Corrections (BuCor) nitong Huwebes.
Batay sa datos ng BuCor mula 2022 hanggang 2025, ang pangunahing sanhi ng kamatayan sa national penitentiary ay acute myocardial infarction – isang medikal na termino para sa atake sa puso (445 kaso), pneumonia (234), acute respiratory failure (71), cerebrovascular accident (65), at chronic kidney disease (61).
Nasa listahan din ang pulmonary tuberculosis (59), electrolyte imbalance (43), sepsis (40), congestive heart failure (35), at anemia (19).
Habang ang tuberculosis ay nananatiling pangunahing alalahanin sa kalusugan sa lahat ng pasilidad ng bilangguan dahil sa siksikan at mahinang bentilasyon, sinabi ni CT/Chief Supt. Ma. Cecilia Villanueva, direktor ng BuCor para sa mga serbisyong pangkalusugan at kapakanan, na ang iba pang mga sakit sa paghinga ay mas karaniwang sanhi ng pagkamatay sa mga kulungan.
Inilabas ng ahensya ang pahayag matapos magtaas ng alarma noong Miyerkules ang forensic pathologist na si Dr. Raquel Fortun sa mataas na bilang ng mga kaso ng tuberculosis sa mga namatay na PDL. RNT/MND
