BATANG NABUBUNTIS, DUMAMI; CPD SA MGA MAGULANG: ‘USAPANG SEX, HUWAG IKAHIYA’

NAGPAHAYAG ng matinding pagkabahala ang Commission on Population and Development (CPD) kasunod ng naitalang pagtaas ng bilang ng pagbubuntis sa mga batang babae na may edad 10 hanggang 14. Dahil dito, nanawagan ang ahensya sa mga magulang at guardians na basagin ang “taboo” at maging bukas sa pakikipag-usap sa kanilang mga anak tungkol sa sekswalidad sa loob mismo ng tahanan.

Nakababahalang Datos

Batay sa pinakabagong ulat ng CPD, umakyat sa 3,516 ang kaso ng pagbubuntis sa natu­rang age group, mas mataas kumpara sa 3,343 naitala noong 2023. Binigyang-diin ng komisyon na ang trend na ito ay alarmang pan­lipunan dahil ang mga bata sa ganitong edad ay hindi pa pisikal na handa para sa pagdadalang-tao, at malaki ang po­sibilidad na sila ay biktima ng pang-aabuso.

Ipinaalala ni Mylin Mirasol Quiray, chief ng CPD Information Management and Communications Division, na ang age of se­xual consent sa Pilipinas ay 16. Anomang sekswal na aktibidad sa mas batang edad ay hindi lamang mapanganib sa kalusugan kundi may kaakibat ding legal na implikasyon.

Social Media at Maling Impormasyon

Ayon pa sa CPD, isa sa mga pangunahing dahilan ng problema ay ang pagdepende ng mga kabataan sa social media para sa impormasyon tungkol sa sex. Madalas ay hindi tama o mapanlinlang ang mga nakukuha nilang datos online, na nagreresulta sa maling pananaw sa relasyon at reproductive health.

Aminado rin ang opisyal na marami pa ring mga magulang ang naiilang o tumatangging pag- usapan ang sex at sexuality sa kanilang mga anak. Dagdag pa rito ang kakulangan ng ilang lokal na pamahalaan sa mga prog­rama at serbisyong nakatuon sa sapat na edukasyon para sa mga kabataan.

Paggabay ng Magulang at Pamahalaan

Ipinapayo ng mga eksperto na ang edukasyon sa sekswa­lidad ay dapat magsimula nang maaga sa paraang angkop sa edad ng bata. Ang aktibong pag­gabay ng magulang, katuwang ang mga paaralan at lokal na programa, ay itinuturing na pi­nakamabisang depensa upang maprotektahan ang karapatan at kinabukasan ng mga kaba­ta­an.

Sa huli, naniniwala ang CPD na ang komprehensibong reproductive health education ay susi upang maiwasan ang maagang pagbubuntis. Layunin nitong ti­yakin na ang bawat batang Fi­lipino ay lalaking may sapat na kaalaman at kakayahang gumawa ng tamang desisyon para sa kanilang sarili.