RIZAL, Philippines – Arestado ang isang 16-anyos na lalaki noong Feb. 13 sa Phase 1K, Kasiglahan Village, Barangay San Jose, Rodriguez, Rizal, dahil sa ilegal na pagdadala ng baril. Ito rin ang lugar ng robbery-slay sa 20-anyos na working student na si “Jade.”
Narekober sa kanya ang isang .45 Colt pistol na may bala at magazine. Sa imbestigasyon, lumabas na posibleng sangkot ang menor de edad sa nakaraang attempted robbery with homicide noong Feb. 8, na nauwi sa pagkamatay ni Jade.
Ayon sa pulisya, nilapitan ni Jade at ng kanyang babaeng kasama ang tatlong suspek bandang 1:30 a.m. habang pauwi sa bahay ng co-worker sa tricycle. Humingi umano ang mga suspek ng flashlight, ngunit sandaling naglaon ay inagaw ang bag ng babae. Nakuha ni Jade ang bag, at tumakas ang mga suspek. Ngunit kalaunan, natuklasan na na-stab siya ng isa sa mga suspek. Dinala siya sa ospital ngunit idineklara nang patay sa pagdating.
Inireport ng Rizal PPO na ang menor de edad ay isinailalim sa Municipal Social Welfare and Development Office para sa tamang disposisyon ayon sa batas para sa kabataan, at naghahanda rin ng kaukulang kaso. Patuloy ang operasyon ng pulisya para hulihin ang iba pang sangkot.
Ani Col. Eleazar Barber Jr., bagong Provincial Director ng Rizal PPO: “This arrest shows our relentless drive against criminality. No one who threatens public safety will be spared—Rizal PNP will act swiftly and ensure justice is served.” RNT/MND
