Bong Go sa mga guro: Tunay na bayani, gabay ng kabataan

MANILA, Philippines – Itinuturing ni Senator Christopher “Bong” Go ang mga guro na tunay na bayani at gabay ng kabataan bilang tagapagturo at tagahulma ng mga magiging pinuno ng bansa.

Ginawa ni Go ang pahayag sa pagpapakita niya ng suporta sa mga magiging guro nang personal niyang daluhan ang Ultimate Final Coaching series ng Dr. Carl E. Balita Review Center para sa Licensure Examination for Teachers (LET) sa Cuneta Astrodome, Pasay City.

“Edukasyon ang susi sa magandang kinabukasan at ang kabataan ang pag-asa at future leaders ng ating bayan,” ang palaging idinidiin ni Go.

Sa kanyang pagharap sa humigit-kumulang 5,000 future teachers sa huling yugto ng licensure exam, hinimok sila ni Go na manatiling matatag sa kanilang dedikasyon bilang mga tagapagturo.

“Sa ating LET takers, kayo ang kinabukasan ng ating edukasyon. Alam kong hindi madali ang inyong pinagdaanan—mga puyat, pagod, at walang katapusang aralin. Ngunit laging tandaan, lahat ng hirap na ito ay magbubunga ng isang mas makulay na bukas,” ang talumpati ni Go.

Kasabay ng pagdiriwang ng World Teachers’ Month, binigyang-diin ni Go ang mahalagang papel na ginagampanan ng mga guro sa pagbuo sa bansa at sa paghubog sa kabataan na siyang kinabukasan ng ating bayan.

“Sa pagdiriwang ng World Teachers’ Month, nais ko rin pong bigyan ng espesyal na pagkilala ang ating mga guro. Saludo kami sa inyong lahat! Kayo ang tunay na bayani ng ating bayan—ang gumagabay sa ating mga kabataan tungo sa mas maliwanag na hinaharap,” sabi ni Go.

Ibinahagi ni Go ang mga isinusulong niyang batas na susuporta sa sektor ng kabataan. Kabilang dito ang Senate Bill No. 1786, na kung maisasabatas ay mag-uutos sa mga pampublikong institusyong pang-edukasyon (HEIs) na magtatag ng Mental Health Office sa mga kampus. Siya rin ang co-author at co-sponsor ng SBN 2200, o ang Basic Education Mental Health and Well-Being Promotion Act.

Ang senador din ang co-author at co-sponsor ng RA 11510, na nag-institutionalizes sa Alternative Learning System (ALS) upang mapabuti ang basic education delivery sa mga underserved at disadvantaged na mag-aaral, kinabibilangan ng indigenous at mga mag-aaral na may physical at learning disabilities.

Sa kanyang talumpati, kinilala ni Senator Go si Dr. Carl Balita, tagapagtatag ng kilalang Carl Balita Review Center, sa kanyang napakahalagang kontribusyon sa paghahanda ng mga naghahangad maging guro para sa LET. Kinilala rin niya ang mga Luminary Lecturer na nagsilbi sa review center sa loob ng mahigit sampung taon: Ms. Mary Antoinette Magtanong at Ms. Marlene Montero, sa kanilang dedikasyon sa paggabay sa mga mag-aaral tungo sa tagumpay.

“Sa ating future educators, ang tagumpay ninyo ay hindi lamang tagumpay para sa inyong sarili, kundi tagumpay para sa buong bayan. Isang makabuluhang propesyon ang pagiging guro dahil kayo ang magsisilbing ilaw at gabay ng susunod na henerasyon,” Go encouraged as his team provided tokens to all the attendees. RNT