MANILA, Philippines – Sapat na ang isang article upang mapanagot si Vice President Sara Duterte sa Senate impeachment trial nang hindi na inilalatag ang lahat ng apat na Articles of Impeachment, ayon kay House prosecutor at Manila 3rd District Rep. Joel Chua.
Sa isang forum nitong Sabado, Hunyo 13, sinabi ni Chua na nakadepende sa estratehiya ng prosekusyon kung paano tatanggapin ang ebidensya sa paglilitis, at iginiit na ang layunin ng panel ay mapatunayan kung ano ang kinakailangan upang magkaroon ng pananagutan sa ilalim ng Konstitusyon.
Kasalukuyang naghahanda ang House prosecution panel para sa pretrial phase ng impeachment case.
Nauna nang sinabi ng prosecutors na maghahain sila ng kanilang pretrial brief bukas, araw ng Lunes, at ang pretrial conference ay itinakda sa Hunyo 18 habang ang trial proper set ay magsisimula sa Hulyo 6.
Ayon sa panel kamakailan, maghahain sila ng manifestation sa halip na formal reply matapos ilarawan ang sagot ni Duterte sa impeachment complaint bilang “non-answer” sa mga alegasyon.
Nang tanungin naman kung gaano tatagal ang paglilitis, sinabi ni Chua na ang prosekusyon ang magdedesisyon kung itutuloy pa ang lahat ng apat na article kapag naniwala ang mga ito na sapat na ang isa, dalawa o tatlong article upang mapanagot si Duterte.
“It depends because if we think that after one, two, or three articles, our evidence is already strong, then we no longer need to finish all four articles,” ani Chua.
Aniya, ang conviction sa lahat ng apat na article ay hindi required.
“What we need is a conviction on one article,” sinabi ni Chua.
“A conviction on all the articles is not necessary,” dagdag pa nito.
Ayon kay Chua, sa oras na masiguro ang conviction sa isang article ay maaari nang tapusin ang paglilitis.
“If she is convicted on just one article, then the trial is over,” aniya.
“If, for example, after presenting one article we believe the evidence is already strong, we can submit the case and no longer continue with the remaining three articles,” dagdag pa niya.
“We do not have to prove all four articles. If we believe the evidence under the first article alone is strong enough and that it can already lead to a conviction, then we may choose not to proceed with the others and allow the senators to vote on that article alone.” RNT/JGC
