MANILA, Philippines – Muling kinuwestiyon ni Senador Rodante Marcoleta nitong Martes ang Department of Justice (DOJ) sa paggigiit na dapat ibalik ng mga contractor na sina Sarah at Curlee Discaya ang iligal na nakuhang yaman, kung mayroon man, sa kaban ng estado bago sila makapasok sa Witness Protection Program (WPP).
Sa deliberasyon ng Senate Committee on Finance sa panukalang P43.65-bilyong badyet ng DOJ at mga kalakip nitong ahensya para sa taon ng pananalapi 2026, sinabi ni Marcoleta na ang ahensya ay “imagining something that is not within the law.”
“Kung ipipilit na merong restitution kahit wala sa batas, how can you process the application, for example, of the applicant? Kasi kapag tinignan mo…I think the applicable section is Section 10. Basahin mo ‘yun, wala namang restitution,” ayon kay Marcoleta.
“So kung ipilit natin that somebody should first restitute, doon pa lamang sa title ng batas, it is all for the benefit, interest, and protection of the witness. To burden him or her with additional requirement which is not in the law, hindi ko maintindihan how can you agree with that?”
Ang Seksyon 10 ng Republic Act No. 6981 o ang Witness Protection, Security and Benefit Act, ay nagsasaad na ang sinumang tao na lumahok sa paggawa ng isang krimen at nagnanais na maging saksi para sa Estado ay maaaring mag-aplay at posibleng maging kuwalipikadong matanggap sa WPP kung ang mga sumusunod na pangyayari ay naroroon:
–the offense in which his testimony will be used is a grave felony as defined under the Revised Penal Code or its equivalent under special laws;
–there is absolute necessity for his testimony;
–there is no other direct evidence available for the proper prosecution of the offense committed: his testimony can be substantially corroborated on its material points; he does not appear to be most guilty; and he has not at any time been convicted of any crime involving moral turpitude
Sinabi naman ni DOJ officer-in-charge Fredderick Vida na sang-ayon siya sa posisyon ni dating Justice secretary na ngayon ay Ombudsman Jesus Crispin Remulla, na ang restitution ay isa sa mga kondisyon para maging kuwalipikado sa WPP.
Nanindigan din si Justice Undersecretary Jesse Andres na walang inconsistency sa ginagawa ng DOJ, na binanggit ang Section 5 (f) ng batas, na nagsasaad na bago bigyan ng proteksyon ang isang tao, dapat muna siyang magsagawa ng memorandum of agreement na maglalahad ng kanyang mga responsibilidad, kabilang ang pagsunod sa mga legal na obligasyon at hatol ng sibil laban sa kanya.
“This includes po other provisions of law including the civil code on unjust enrichment. Kasama po ‘yan. Every law should be read consistent and harmoniously with other provisions of the law,” saad ni Andres.
“I’m making a distinction po between process and enjoying the benefits under this Act. So ipo-process na po ‘yan dahil matagal naman po ang paraan para malaman at matutunton ang lahat ng civil obligation… Kailangan po natin makuha ang statement ng mga potential witnesses—kailangan pong i-evaluate, kailangan pong malaman,” dagdag pa niya.
Pagkatapos ay muling iginiit ni Marcoleta na hindi niya pinoprotektahan ang mga Discaya.
“I have to explain myself—hindi ko dinidepensahan ang mga taong ‘yun. Ginawa ko lamang ‘yun doon sa nalalaman ko na ma-identify natin ang pinaka-mastermind dito. ‘Yun lang, wala nang iba. Kung gusto niyong ang ma-identify puro butete at sapsap, bahala na kayo sa buhay ninyo,” aniya. RNT/MND
