MANILA, Philippines – Nauna nang nakapag-deploy ang Department of Social Welfare and Development ng P720,925 halaga ng relief aid sa 14,500 pamilyang apektado ng Tropical Storm Ramil.
Sinabi ni DSWD spokesperson at Assistant Secretary Irene Dumlao na ang paunang ayuda ay binubuo ng 382 family food packs (FFPs) at 547 ready-to-eat-food (RTEF) boxes.
“Nagsimula na po tayong mamigay ng paunang relief aid sa mga apektadong pamilya ng Bagyong Ramil. Kaagapay po tayo ng mga local government units para makapagbigay ng agarang tulong at kapanatagan sa mga apektadong pamilya, na palaging bilin ng ating Pangulong Ferdinand R. Marcos Jr., tuwing may sakuna,” saad ni Dumlao.
“Sa Bicol Region, kung saan nagkaroon ng suspension ng sea travel, agad pong nagpa-abot ang mga disaster response personnel natin ng RTEF sa mga locally stranded individuals. Mabilis rin tayong nakapamahagi dito sa Sorsogon, kung saan unang nag-landfall itong Bagyong Ramil,” ani pa niya.
Inaasahan ng DSWD na mas maraming LGU ang hihingi ng augmentation support dahil inaasahang tataas ang bilang ng mga apektadong pamilya kapag nakumpleto na ang data consolidation at lumabas si Ramil sa Philippine area of responsibility.
Tiniyak ni Dumlao na ang DSWD ay may sapat na kagamitan upang magbigay ng karagdagang tulong kung kinakailangan, dahil halos dalawang milyong FFP ang nakalagay sa mga bodega ng ahensya sa buong bansa.
“Bagamat marami pong pinagkakaabalahan ang DSWD dahil na rin sa mga major earthquakes na nangyari at bagyo na sunod-sunod na nanalasa nitong nakaraan ay sapat po at tuloy-tuloy ang replenishment ng relief supplies natin and we are in solidarity with our President in ensuring that no Filipino would go hungry in times of disasters or emergencies,” aniya.
Idinagdag ni Dumlao na ang DSWD ay mayroong mahigit P169 milyon na stand-by na pondo na handang i-tap para sa isinasagawang disaster response operations. RNT/MND
