MANILA, Philippines – Hinimok ng Independent Commission for Infrastructure (ICI) ang Ombudsman na imbestigahan si dating DPWH Secretary Manuel Bonoan at mga undersecretaries na sina Roberto Bernardo at Maria Catalina Cabral kaugnay ng P69.4 milyong “ghost” flood control project sa Plaridel, Bulacan.
Ayon kay ICI chair Andres Reyes, Jr., ang Riverbank Protection Structure sa Barangay Bagong Silang (Purok 4) ay na-flag ng Commission on Audit (COA) dahil itinayo sa maling lokasyon at kulang sa tamang dokumentasyon.
“Ang Komisyon ay nagrekomenda sa Ombudsman na suriin kung may posibleng paglabag sa Code of Conduct at Ethical Standards para sa mga opisyal at empleyado ng gobyerno,” ani Reyes.
“Ang pampublikong opisina ay isang tiwala ng publiko. Ang serbisyo sa publiko ay nangangahulugang sakripisyo para sa kapakanan ng mga Pilipino at hindi para pagbutihin ang sariling buhay sa kapinsalaan ng bayan.”
Hinimok din ng ICI ang Ombudsman na suriin kung may kasong maaaring ihain laban sa iba pang mga inhinyero para sa malversation at paglabag sa Anti-Graft and Corrupt Practices Act at Government Procurement Reform Act.
Nagbitiw na sina Bonoan at Cabral, at inamin ni Bonoan ang kanyang pagiging kalahok sa anomalya sa ilang flood control projects. Santi Celario
