Ex-PBA star player naghain ng kandidatura bilang konsehal sa Maynila

MANILA, Philippines – TULUYAN nang pinasok ng kilalang dating Philippine Basketball Association (PBA) star player na si Paul “Bong” Alvarez ang mundo ng politika makaraang maghain ito ng kanyang Certificate of Candidacy (COC) bilang “aspirant councilor” sa ikatlong Distrito sa Lungsod ng Maynila nitong Miyerkules, Oktubre 2.

Kilala si Alvarez sa tawag na “Mr. Excitement” dahil sa bilis at liksi nito sa paglalaro ng basketball noong dekada 90.

Si Alvarez ay nasa partido ng Aksyon Demokratiko kung saan nagsisilbing Presidente nito si dati at magbabalik na Alkalde sa lungsod ng Maynila na si Isko Moreno Domagoso.

Bukod kay Alvarez ay naghain din ng kandidatura si Manila 5th District Councilor Bobby Espiritu para sa kanyang ikalawang termino sa ilalim din ng Aksyon.

Kasama ni Espiritu ang kanyang pamilya gayundin ang kanyang ama na si dating Manila City Administrator Felix Espiritu.

Ilan pa sa mga “re-electionist” na naghain ng kanilang kandidatura sa pagka-konsehal ay sina 1st District Niño Dela Cruz (Asenso Manileño) at Irma Alfonso (Aksyon); 3rd District Tol Zarcal (Aksyon) at Fa Fugoso (Asenso); 5th District Mon Yupangco (Aksyon); 6th District Caloy Castañeda, Lou Veloso at Elmer Par na pawang nasa ilalim ng Aksyon.

Inaasahan naman na maghahain ng kandidatura ang tambalang Mayor Honey Lacuna-Pangan at Vice Mayor Yul Servo Nieto bukas ng Huwebes, Oktubre 3 habang ang kanilang makakatunggali na sina Isko Moreno at Chi Atienza naman ay nakatakdang maghain ng kanilang kandidatura bilang alkalde at bise alkalde ng Maynila sa darating na Oktubre 8. JR Reyes