OCCIDENTAL MINDORO, Philippines – Boluntaryong piniling manatili sa ilalim ng kustodiya ng gobyerno si Filipino-American activist Chantal Anicoche para sumailalim sa medikal na paggamot, ayon sa militar.
Sa isang affidavit, tiniyak ni Anicoche na ang desisyon ay “boluntaryo at walang pamimilit o pananakot,” na pinanood ng isang independenteng abogado mula sa Integrated Bar of the Philippines.
“The 2nd Infantry Division honors her intent and recognizes the primacy of addressing her medical condition after she suffered difficult physical and mental challenges,” sabi ni Col. Michael Aquino, tagapagsalita ng 2ID.
Natagpuan si Anicoche noong Enero 8 habang nagtatago sa isang hukay malapit sa engkwentro ng gobyerno at NPA sa Sitio Mamara, Barangay Cabacao, Abra de Ilog, Occidental Mindoro.
Ayon sa militar, “She was among those left behind by the fleeing NPAs… She had reportedly gone eight days without food and water.” Dinala agad siya sa Army hospital sa Camp Capinpin para sa medikal na atensiyon.
Gayunpaman, humiling ang human rights at migrant groups ng agarang pagpapalaya kay Anicoche, na tinuturing na nawawala matapos ang military bombardment sa lugar. RNT/MND
