MANILA, Philippines – Ibabalik ni Interior Secretary Jonvic Remulla ang ginastos sa drug test ni Reina Mercedes, Isabela Vice Mayor Harold Respicio.
“Kukunin ko sa [Department of the Interior and Local Government] namin yung number niya tapos i-G-GCash ko sa kanya,” sinabi ni Remulla nitong Huwebes, Oktubre 8.
Sa Facebook post, inupload kasi ni Respicio ang QR code ng kanyang Gcash account kung saan maaaring ibayad ni Remulla ang P28,011 na ginastos nito.
“Jonvic, ito QR code. Pa-GCash P28,011. Reimbursement for drug test,” ani Respicio.
Matatandaan na hinamon ni Remulla si Respicio nitong Miyerkules na sumailalim sa drug test kasunod ng viral video ng kanyang paninigaw sa mga opisyal ng barangay dahil umano sa hindi nakumpletong proyekto para sa mga tobacco farmer.
Agad namang tumugon si Respicio sa panawagan ni Remulla at nagpa-drug test sa St. Luke’s Medical Center–Quezon City.
Inupload pa nito ang invoice na nagpapakita ng gastos sa drug test na nasa P28,000.
Nakita sa resulta na negatibo si Respicio sa methamphetamine, tetrahydrocannabinol (THC), cocaine, ecstasy, benzodiazepines, opiates, propoxyphene, at tricyclic antidepressants.
Binati naman ni Remulla si Respicio sa negatibong drug test result at sinabing, “Now that it’s confirmed that he’s not on shabu, totoo na talaga na natural ang sayad ng utak niya.” RNT/JGC
