Goitia: ‘Pambubully’ ng China, patunay ng kahinaan ng posisyon nito

MANILA, Philippines — Tinuligsa ni Dr. Jose Antonio Goitia ang pag-abot ng note mula sa panig ng China kay Defense Secretary Gilberto “Gibo” Teodoro Jr. habang nagsasalita ito sa Seoul Defense Dialogue, na tinawag niyang pambubully at pagtatangkang manakot sa isang pandaigdigang forum.

Muling iginiit sa note na “illegal, null and void” umano at walang binding force ang 2016 South China Sea arbitral ruling.

Kinuwestiyon naman ni Teodoro ang argumento ng Beijing, na patuloy na tumatangging kilalanin ang desisyong inilabas ng arbitral tribunal sa ilalim ng United Nations Convention on the Law of the Sea (UNCLOS).

“Of course, because you lost,” tugon ng kalihim sa pahayag ng China na hindi nito tinatanggap o kinikilala ang ruling.

Tinawag din ni Teodoro ang nangyari na “actual coercion, bullying and aggression” at binatikos ang paraan ng paghahatid ng note habang ginaganap ang forum sa South Korea.

Para kay Goitia, lalo lamang inilantad ng insidente ang kahinaan ng legal na posisyon ng China sa usapin ng West Philippine Sea at South China Sea.

“Maaaring gamitin ng China ang kapangyarihan nito para manakot, pero hindi nito kayang gamitin ang kapangyarihang iyon para baguhin ang batas. Hindi yuyuko ang Pilipinas sa pambubully dahil hindi China ang magdidikta sa ating soberanya,” ani Goitia.

Iginiit niyanga niyang hindi nasusukat sa lakas militar o ekonomiya ang pagiging legal ng isang pag-aangkin.

“Hindi nagiging legal ang isang pag-aangkin dahil lamang paulit-ulit itong sinasabi,” dagdag niya.

NaMuling pinagtibay ng 2016 arbitral ruling ang sovereign rights ng Pilipinas sa exclusive economic zone nito at ibinasura ang legal na batayan ng malawak na “nine-dash line” claim ng China. Patuloy namang tinatanggihan ng Beijing ang desisyon.