MANILA, Philippines – Pinangunahan ng Bureau of Corrections (BuCor) ang groundbreaking ceremony nitong Lunes, Abril 20 sa P470-milyong correctional facility sa Palayan City, Nueva Ecija.
Ayon sa BuCor, ang pasilidad na itatayo sa Barangay Pinaltakan, ay kayang tumanggap ng hanggang 7,500 inmates o persons deprived of liberty (PDLs).
Kabilang sa complex ang maximum-, medium-, at minimum-security camps; Reception and Diagnostic Center; at Drug Treatment and Rehabilitation Center.
Magkakaroon din ito ng Correctional Institution for Women, vocational at livelihood facilities, agricultural production areas, in-facility courtrooms, at housing para sa mga tauhan ng BuCor.
Idinagdag ng BuCor na ang pasilidad ay magkakaroon ng perimeter fence na may fortified walls, elevated guard towers, controlled entry points, advanced surveillance and communication systems, at solar lighting.
Ang 60 ektaryang lupain ay ibinigay ng Provincial Government of Nueva Ecija.
Samantala, siniguro naman ni BuCor Director General Gregorio Catapang Jr. kay Governor Aurelio Umali at mga residente ng Palayan na ang proyekto ay magbibigay ng malaking economic benefits sa lungsod dahil lilikha ito ng mga trabaho sa oras na maging operational.
Inaasahan din na magpapataas ito sa demand para sa pagkain, materyales at iba pang serbisyo.
Inaasahang makukumpleto ang pasilidad sa pagtatapos ng 2027. RNT/JGC
