MANILA, Philippines – Ang southwest monsoon o habagat ay patuloy na nagdadala ng mga pag-ulan sa maraming bahagi ng Pilipinas nitong Sabado, Hulyo 12, na nag-udyok sa mga opisyal na magbabala sa posibleng pagbaha at pagguho ng lupa sa mga apektadong lugar.
Batay sa pinakahuling weather update mula sa Philippine Atmospheric, Geophysical and Astronomical Services Administration (PAGASA), isang tropical storm na matatagpuan sa labas ng Philippine Area of Responsibility (PAR) ang nagpapataas ng “habagat.”
Alas-3 ng umaga, ang bagyo ay nasa layong 1,925 km silangan-hilagang-silangan ng extreme northern Luzon, na may lakas ng hangin na 65 km/h at pagbugsong aabot sa 80 km/h.
Mabagal itong kumikilos pakanluran-hilagang-kanluran at hindi direktang banta sa bansa, sabi ng PAGASA.
Gayunpaman, sinabi ng PAGASA na ang tropical storm ay nagpapatindi sa habagat, na nagreresulta sa paminsan-minsang pag-ulan sa Western Visayas, Cavite, Batangas, Palawan, at Occidental Mindoro.
Ang mga lugar na ito ay nasa panganib ng flash flood at landslide dahil sa katamtaman hanggang sa malakas na pag-ulan, dagdag ng weather bureau.
Samantala, ang Metro Manila, Mindanao, Central Luzon, ang Bicol Region, Pangasinan, at ang natitirang bahagi ng Visayas, Calabarzon, at Mimaropa ay nakararanas ng maulap na papawirin na may kalat-kalat na pag-ulan at pagkidlat-pagkulog.
Ayon pa sa PAGASA na ang mga lugar na ito ay maaari ding makaranas ng localized na pagbaha at pagguho ng lupa, lalo na sa mga mabababang lugar at bulubunduking rehiyon.
Ang nalalabing bahagi ng Luzon ay magkakaroon ng bahagyang maulap hanggang sa maulap na papawirin na may pulu-pulong mga pag-ulan o pagkidlat-pagkulog, na maaari pa ring magdulot ng mga pagbaha at pagguho ng lupa sa panahon ng matinding pagkidlat-pagkulog.
Hinikayat ng PAGASA ang publiko na manatiling mapagmatyag at subaybayan ang mga update sa panahon, partikular sa mga lugar na madaling kapitan ng pagbaha at pagguho ng lupa. Pinapayuhan ang mga local government unit na magsagawa ng mga kinakailangang pag-iingat upang matiyak ang kaligtasan ng mga residente. RNT/MND
