MANILA, Philippines- Hinimok ng Philippine Heath Insurance Corporation (PhilHealth) ang health facilities na mag-apply bilang Konsulta Package providers sa kanilang lugar.
Sinabi ni PhilHealth Corporate Affairs Group acting Vice President Rey Baleña sa isang panayam na target ng pambansang gobyerno na magkaroon ng mahigit 5,000 Konsulta Package providers alinsunod sa layunin nitong gawing accessible para sa bawat Pilipino ang de-kalidad na pangunahing pangangalagang pangkalusugan.
Sa kasalukuyan, ang PhilHealth ay mayroong 2,686 accredited Konsulta Package providers sa buong bansa at ang kanilang mga detalye ay makikita sa website ng PhilHealth.
Nagbibigay sila ng medical consultations at preventive health services. Tinutulungan din nila ang mga pasyente na makakuha ng mga serbisyo mula sa ibang mga pasilidad ng kalusugan ng kasosyo o mga referral sa mga naaangkop na ospital para sa paggamot sa sakit.
Ayon sa PhilHealth, maaring mag-apply ang mga rural health units, private clinics, outpatient departments, company clinics at school clinics.
Noong nakaraang linggo, itinaas ng PhilHealth Board ang capitation bawat pasyente mula P550 sa P1,700 bawat taon.
Upang mapakinabangan ang mga benepisyo ng Konsulta Package, kailangang magparehistro ang mga miyembro sa provider na kanilang pinili gamit ang kanilang PhilHealth identification number sa pamamagitan ng member portal.
Pinayuhan din ni Baleña ang mga miyembro na pumili ng mga provider na malapit sa kanilang mga tirahan o lugar ng trabaho. Jocelyn Tabangcura-Domenden
