MANILA, Philippines – Iniutos ng Department of the Interior and Local Government (DILG) nitong Lunes ang lahat ng local government units (LGUs) sa lalawigan ng Cebu at Mindanao na magsagawa ng agarang structural inspections kasunod ng sunod-sunod na malalakas na lindol at aftershocks na tumama sa kanilang mga lugar nitong mga nakaraang araw.
Sa isang advisory na inilabas ngayong Lunes, binigyang-diin ng DILG na dapat unahin ng mga LGU ang mabilis na assessment sa kaligtasan ng mga gusali, tahanan, at kritikal na imprastraktura lalo na ang mga nasa mga barangay na lubhang apektado o nagpapakita ng mga nakikitang bitak, pinsala, o senyales ng pagguho.
“LGUs must undertake rapid structural assessments led by Building Officials, Municipal and City Engineers, and other technical personnel,” ayon sa DILG.
“Priority should be given to structures in heavily affected barangays and those reported to have visible cracks, partial collapse, or foundation damage.”
Ang mga istrukturang nakitang tumagilid dahil sa mga bitak sa lupa, paghupa, o sediment venting ay dapat suriin bago payagan ang muling pag-okupa, dagdag ng ahensya.
Nanawagan naman ang DILG sa mga LGU na makipagtulungan sa Department of Public Works and Highways (DPWH), local disaster risk reduction and management offices, at mga opisyal ng barangay sa pagsasagawa ng magkasanib na inspeksyon at pagbabahagi ng mga natuklasan.
“All efforts must adhere to existing government issuances and protocols on post-earthquake structural evaluation,” ayon sa advisory.
Para sa mga gusaling idineklarang hindi ligtas, sinabi ng DILG na kailangan ng agarang aksyon, kabilang ang paglikas ng mga residente at paglipat sa mga pansamantalang tirahan.
Hinimok ng ahensya ang koordinasyon sa Municipal Social Welfare and Development Offices (MSWDOs) para tulungan ang mga apektadong pamilya.
Pinaalalahanan din ang mga LGU na pabilisin ang pag-iisyu ng mga permit na kailangan para sa pagkukumpuni at muling pagtatayo, habang tinitiyak ang pagsunod sa mga pamantayan ng pambansang kaligtasan at engineering.
Nauna nang inatasan ni Pangulong Ferdinand Marcos Jr. ang mga pambansang ahensya na magbigay ng agarang tulong sa mga apektadong komunidad at pabilisin ang mga pagsisikap sa pagbawi.
Ang mga awtoridad ay hindi pa naglalabas ng kumpletong pagtatasa ng pinsala, ngunit ang mga unang ulat ay nagpapahiwatig ng mga makabuluhang epekto sa istruktura sa ilang mga bayan sa Davao Oriental at bahagi ng Cebu. RNT/MND
