MANILA, Philippines – Sinabi ni Palace Press Officer Undersecretary Atty. Claire Castro na maaaring maging ‘redundant’ o ma-duplicate nang lilikhaing Independent People’s Commission (IPC) ang tungkulin ng Office of the Ombudsman at Department of Justice (DOJ).
Ito’y dahil sa iimbestigahan nito hindi lamang ang flood control projects kundi maging ang iba pang infrastructure projects.
“Kung gagawa sila ng batas para mag-create ng Independent People’s Commission, sana ‘yung constitutionality nito ay hindi makuwestiyon dahil baka magkaroon ng redundancy,” ang sinabi ni Castro sa Isang panayam.
“Mayroon na talagang nakatalaga for that. ‘Yung Ombudsman and DOJ, para sila ang mag-hearing, tumingin at mag-evaluate ng probable case. Sila ang magpa-file ng case sa Sandiganbayan o sa korte,” dagdag na wika nito.
Ang paliwanag pa ni Castro, ang Independent Commission for Infrastructure (ICI) ay nilikha para makabuo ng “fact-finding” commission, mangalap ng mga dokumento at i-endorso ito sa Ombudsman at DOJ.
“Bakit walang contempt power [ang ICI]? Kasi hindi ang dahilan nito ay mag-penalize, magpakulong o magparusa sa taong hindi a-attend [ng hearing],” ang sinabi ni Castro. (KRIS JOSE)
