MANILA, Philippines- Nadakip ng mga awtoridad ang isang hinihinalang opisyal ng communist terrorist group sa Cagayan de Oro.
Sinabi ng Philippine National Police – Criminal Investigation and Detection Group (PNP-CIDG) nitong Linggo na naaresto si alyas “Kumander” sa isang manhunt operation sa Barangay Indahag.
Kalihim umano ng grupo, nahuli si Kumander sa paglabag sa Anti-Terrorism Act of 2020 at nahaharap sa dalawang magkahiwalay na murder charges, multiple attempted homicide, at child abuse.
Ang arrest warrants ay inisyu ng Regional Trial Courts sa Iligan City, Lanao del Norte; Isulan, Sultan Kudarat; Tagum City, Davao del Norte; at Surallah, South Cotabato noong 2022 at 2024.
Kinilala ang 50-anyos na suspek bilang number 5 regional most wanted person ng Police Region Office 12 sa paglabag sa Anti-Terrorism Act.
Siya rin ang number 5 regional most wanted person ng Police Region Office 11 para sa murder.
Sa operasyon, nakumpiska ng mga awtoridad ang isang fragmentation grenade, isang Colt caliber 45 pistol, isang steel magazine, rounds of ammunition, dalawang blasting caps, isang detonating cord, at tatlong identification cards.
Nadakip din ng mga awtoridad ag isang umano’y high-ranking leader ng New People’s Army sa Barangay Indahag, Cagayan de Oro City.
Ayon sa ulat, nagsilbi umano ang suspek na secretary general ng Far South Mindanao Region (FSMR) ng NPA. RNT/SA
