MANILA, Philippines – Natanggap na ng mga abogado ni Vice President Sara Duterte ang warrant of arrest laban sa kanya kaugnay ng tatlong counts ng grave threats at nakatakda silang magpiyansa sa lalong madaling panahon, ayon kay Interior Secretary Jonvic Remulla nitong Biyernes.
“Their lawyers confirmed that they received the warrant and they intend to post bail ASAP,” pahayag ni Remulla.
Inilabas ng Quezon City Regional Trial Court Branch 98 ang warrant matapos nitong makitang may probable cause upang litisin si Duterte sa tatlong bilang ng grave threats. Itinakda ang piyansa sa P120,000 bawat count.
Ayon sa Department of Justice (DOJ), ibinasura rin ng korte ang mosyon ng Bise Presidente na ipagpaliban o bawiin ang pag-isyu ng warrant.
Nauna nang hiniling ng kampo ni Duterte na i-quash ang mga information dahil umano sa kawalan ng jurisdiction. Iginiit nito na may procedural immunity ang isang nakaupong impeachable officer habang nagpapatuloy ang impeachment proceedings.
Gayunman, sinabi ng abogado ni Duterte na si Atty. Paul Lawrence Lim na walang intensyon ang Bise Presidente na umiwas sa batas at patuloy nitong gagamitin ang lahat ng legal remedies na available sa kanya.
Nag-ugat ang mga kaso sa mga pahayag ni Duterte noong 2024 hinggil kina Pangulong Ferdinand Marcos Jr., First Lady Liza Araneta-Marcos at dating House Speaker Martin Romualdez.
Nauna nang iginiit ng Bise Presidente na ang kanyang mga pahayag ay “maliciously taken out of logical context” at hindi umano ito banta kundi pagtukoy sa sinasabi niyang panganib sa kanyang sariling seguridad.
Ang pag-isyu ng warrant ay hindi katumbas ng hatol laban kay Duterte, na nananatiling presumed innocent habang dinidinig ang mga kaso.
