Kelot dedo sa sagasa ng tourist bus sa Pasay

MANILA, Philippines – Patay ang isang 48-taong gulang na lalaki matapos tumakas sa pagkakahuli ng mga pulis at masagasaan ng isang tourist bus sa Pasay City Sabado ng umaga, Pebrero 7.

Kinilala ni Pasay City police chief P/Col. Joselito De Sesto ang biktima na si Ricson Timosan Y Linao, 48, residente ng 534 Sampaguita St., Villa Sta. Maria, Zamboanga City.

Sa sketchy report na isinumite ni De Sesto sa Southern Police District (SPD), naganap ang aksidente ng pagkakasagasa sa biktima bandang alas 5:45 ng umaga sa harap ng Cebu Pacific, sa kahabaan ng northbound lane ng Domestic Road, Pasay City.

Base sa inisyal na imbestigasyon, sinabi ni De Sesto na dakong alas 5:00 ng umaga ay minamaneho ng biktima ang kanyang Nissan Navara (ZAC 1306) nang sitahin ng mga nagpapatrulyang miyembro ng Highway Patrol Group (HPG) sa kahabaan ng Andrews Avenue sa nabanggit na lungsod dahil sa improvise licensed plate ng kanyang minamanehong sasakyan.

Makaraan ang pagsita sa biktima ay dinala ito sa HPG South District Office sa may Domestic Road, Pasay City, at itinuloy ang pagsasagawa ng beripikasyon kung saan nadiskubre ang kinahaharap na tatlong standing warrants sa kasong estafa ng biktima.

Sa pagkakataong ito ay pinosasan na ang dalawang kamay ng biktima sa kanyang harapan para dalhin sa Camp Crame, Quezon City ngunit matapos pagbuksan ito ng pinto sa main entrance ng opisina ng HPG para isakay sa sasakyan ay mabilis itong tumakas at nagtatakbo papalabas ng gusali.

Agad namang hinabol ng mga nagbabantay na pulis ang biktima ngunit sa kanyang pagmamadali ng pagtakas ay aksidente siyang natumba habang papatawid sa gitna ng kalsada.

Sa pagkakataong ito ay tiyempo namang paparating ang isang PTX tourist bus na may body number 8825 (NIK 1101) na minamaneho ni Aldwin Satira y Train, 52, ng Molino Heights, Molino III, Bacoor, Cavite, at nasagasaan ng kaliwang unahang gulong ang biktima na nagresulta ng kanyang agarang kamatayan.

Mabilis na tumakas si Satira makaraan ang insidente na kinalaunan ay sumuko din ito sa tanggapan ng Vehicular Traffic Investigation Section (VTIS), Pasay City Police Station (CPS).

Nahaharap sa kasong reckless imprudence resulting in homicide si Satira na kasalukuyang nasa kustodiya ng VTIS ng Pasay City police. James I. Catapusan