MANILA, Philippines – Arestado sa entrapment operation ang 37-anyos na negosyante sa umano’y pagbebenta ng pekeng suka sa Oas, Albay.
Kinilala ni Lieutenant Colonel Joseph Marribay, director ng Criminal Investigation and Detection Group (CIDG) Albay Field Unit, ang suspek na si Peter Neito III, residente ng Purok 3, Barangay 45-Dita, Legazpi City.
Ani Marribay, isinagawa ang operasyon sa ilalim ng “Oplan Mega Shopper” on Wednesday, kung saan nahuhuli ang suspek na nagbebenta ng halos P7,000 halaga ng pekeng D.S. Sugar Cane Vinegar sa undercover officer na nagpanggap bilang poseur-buyer.
“Prior to his arrest, we received an intelligence report on the illegal product. To confirm its veracity, we conducted surveillance and positively discovered the production area in an outskirt village of Mauraro in Guinobatan town,” ayon pa kay Marribay.
Kinumpirma naman ni Augusto Molo Austera Jr., authorized representative at regional sales manager ng DS New Pervis Foods, na ang mga nakumpiskang produkto na kumakalat sa mga lokal na pamilihin sa Bicol ay peke.
Nasamsam mula sa suspek ang apat na P1,000 marked bills na ginamit bilang buy-bust money; walong kahon ng D.S. Sugar Cane Vinegar na naglalaman ng tig-30 bote kada kahon; dalawang kahon ng Rufina patis na may tig-30 bote; Hyundai Kona na sasakyan na ginagamit para ibyahe ang illegal na produkto.
Nahaharap ang suspek sa reklamong paglabag sa Republic Act No. 8293, o Intellectual Property Code of the Philippines. RNT/JGC
