MANILA, Philippines – Sinabi ni Interior and Local Government Secretary Jonvic Remulla nitong Miyerkules, Nobyembre 12 na ang kopya ng umano’y arrest warrant ng International Criminal Court (ICC) laban kay Senador Ronald “Bato” dela Rosa ay nakuha umano ni Ombudsman Jesus Crispin “Boying” Remulla mula sa isang “third source.”
“Sa telepono lang kami nagkausap. Ang sinabi niya sa akin, nakuha niya ang electronic copy from a third source. So, hindi po galing sa ICC,” sinabi ni Jonvic sa panayam ng DZBB.
“But in form and in function, mukha siyang official. But as far as we are concerned kasi, basta nasa security aparatus ka, dapat actionable document. Dapat dumating talaga,” dagdag pa niya.
Tumanggi itong magkomento kung paano ipatutupad ng Philippine National Police (PNP) ang posibleng arrest warrant ng ICC laban kay Dela Rosa.
Maghihintay muna aniya ang mga awtoridad ng opisyal na kopya ng kautusan.
Matatandaan na noong Nobyembre 8 ay sinabi ni Ombudsman Remulla na ang ICC ay nag-isyu ng arrest warrant laban kay Dela Rosa.
Nauna nang sinabi ng DILG na walang red notice mula sa ICC na natatanggap ang Center for Transnational Crime.
Sinabi ni ICC spokesperson Fadi El Abdallah sa isang panayam na “ICC news can be found only on ICC official communications channels and press releases, and you can see that we still have only one case currently, the one against Mr. Duterte.” RNT/JGC
