MANILA, Philippines – Kinumpirma ni Senate President Pro Tempore Panfilo “Ping” Lacson noong Linggo, Disyembre 28, na humiling si Batangas 1st District Rep. Leandro Leviste ng pagpupulong para humingi ng payo tungkol sa umano’y mga files ng yumaong DPWH Undersecretary Catalina Cabral.
“True. Cong. Leviste was requesting for a meeting ‘to seek advice on how to go about the Cabral files, etc.,” ani Lacson sa mga mamamahayag.
Ayon kay Lacson, hindi natuloy ang pagpupulong noon dahil abala siya sa Senate Blue Ribbon Committee na pinamumunuan niya, kasabay ng imbestigasyon sa flood control anomalies at budget matters. “Hindi kami natuloy. He reiterated and I told him we will schedule after New Year,” dagdag niya.
Ibinahagi ni Leviste sa kanyang social media ang mga dokumentong umano’y mula kay Cabral, na naglalaman ng detalyadong summary ng DPWH allocations kada distrito, probinsya, at rehiyon mula 2023 hanggang 2026.
Gayunpaman, itinuring ng Malacañang na questionable ang tinaguriang “Cabral files,” ngunit iginiit ni Leviste na ito ay “authentic.” RNT/MND
