MANILA, Philippines – Nakalista bilang bahagi ng mga witness ng prosecution team ng Kamara si “Mary Grace Piattos” sa impeachment trial ni Vice President Sara Duterte.
“[Mary Grace Piattos will be presented as witness] to testify on their alleged receipt of confidential funds,” saad sa pre-trial brief.
Lumutang ang pangalang Mary Grace Piattos sa pagdinig noong 2024 ng House good government and public accountability sa paggamit ng badyet ng Office of the Vice President at Department of Education kung saan ang acknowledgment receipts ng confidential fund disbursements ay nagpakitang isa ito sa mga tumanggap ng confidential fund mula sa mga opisina ni Duterte.
Sa kabila nito ay sinabi ng Philippine Statistics Authority na wala silang birth, death o anumang identification records ng taong may pangalang “Mary Grace Piattos.”
Ang iba pang lumabas na pangalan sa acknowledgment receipts ay sina Xiaomi Ocho, Kokoy Villamin, Milky Secuya, at iba pa.
Ayon sa pre-trial brief, si Piattos ay ipipresenta bilang witness para sa Article 1 na nag-aakus sa Bise Presidente ng culpable violation of the Constitution, graft and corruption, at betrayal of public trust sa umano’y maling paggamit ng P612.5 milyong halaga ng confidential funds.
Noong Pebrero, sinabi ng kampo ni Duterte na ipapaliwanag nila ang paggamit ng mga alyas para sa confidential funds katulad ng “Mary Grace Piattos.”
“Specifically the ‘Mary Grace Piattos,’ we are ready to respond to that and explain bakit may mga ganyan,” sinabi ni Michael Poa, spokesperson ng defense team ni Duterte.
Samantala, ipipresenta rin na witness si ex-Overall Deputy Ombudsman Carandang, para sa Article 2 na nag-aakusa naman kay Duterte ng culpable violation of the Constitution at betrayal of public trust sa hindi maipaliwanag na yaman, false entries sa kanyang Statement of Assets, Liabilities and Net Worth at patuloy na business interests.
“[Carandang will be presented as witness] to prove that he investigated the bank accounts and transactions of respondent and Rodrigo Duterte, and the result thereof,” sinabi pa sa pre-trial brief.
Ang Senate impeachment trial ni Duterte ay nakatakdang magsimula sa Hulyo 6. RNT/JGC
