SULU, Philippines – Opisyal nang idineklarang may Stable Internal Peace and Security (SIPS) ang lalawigan ng Sulu matapos ang ilang dekadang armadong tunggalian at mga hamon sa seguridad.
Ginawa ang deklarasyon noong Setyembre 24 sa pamamagitan ng Provincial Peace and Order Council Resolution No. 3, Series of 2026, na nagsasabing ang mga insurgent formation sa lalawigan ay nabuwag at bumaba na sa non-threat level.
Pinangunahan ni Gov. Abdusakur Tan II ang seremonya na dinaluhan nina Defense Secretary Gilberto Teodoro Jr., dating Interior Secretary Rafael Alunan III, Vice Gov. Abdusakur Tan, Maj. Gen. Leonardo Peña ng 11th Infantry “Alakdan” Division at iba pang lokal at security officials.
Nagpakita rin ang military at police personnel ng mga isinukong baril bilang bahagi ng kampanya laban sa paglaganap ng loose firearms sa rehiyon.
Inalala ni Tan ang mahabang pakikibaka ng Sulu laban sa terorismo, kidnapping at kaguluhan at binigyang-diin ang kahalagahan ng kooperasyon ng mga sibilyan, military at komunidad.
“The people themselves remain indispensable partners in maintaining security and stability,” ani Tan.
Binigyang-diin naman ni Teodoro ang papel ng mga civilian institution, edukasyon, pagpapahalaga sa pamilya at aktibong pakikilahok ng mga religious at local leaders upang mapanatili ang kapayapaan.
Patuloy namang makikipag-ugnayan ang mga yunit ng Joint Task Force Orion sa mga lokal na pamahalaan, law enforcement at komunidad upang mapanatili ang seguridad at suportahan ang socio-economic development sa lalawigan. RNT/MDS
