Manila, Philippines – Aarangkada na ang magkakasamang pagdinig ng iba’t ibang komite upang talakayin ang krisis sa langis na nagaganap sa kasalukuyan bunga ng tensyon sa Gitnang Silangan.
Ayon sa tanggapan ni House Speaker Faustino “Bogie” Dy III, nakahanda na ang mga sistemang ipatutupad sa panahon ng pagdinig, na kabibilangan ng may 13 pangunahing komite upang madaliin ang mga panukalang makatutulong na mapagaan ang dulot ng sunud-sunod na pagtaas ng presyo ng langis sa mga Pilipino.
Ang pagdinig, na sisimulan bukas ng alas-9:30 ng umaga sa People’s Center Building, ay pangungunahan ni Marikina City Rep. Miro Quimbo, chairman ng Committee on Ways and Means, na “tasked to craft a unified legislative response to the global fuel shock triggered by the escalating Middle East conflict.”
Ang nabanggit na mga komite ay inatasan ni Speaker Dy na pag-aralan, repasuhin, at makipagtulungan sa sangay ehekutibo upang makabuo ng konkretong polisiya sa lumalalang krisis sa bansa dulot ng sunud-sunod na pagtaas sa presyo ng langis.
Sinabi ni Dy na ang paunang pagdinig bukas ay sesentro sa kalagayan ng suplay ng langis sa bansa kasunod ng tensyon sa Gitnang Silangan bunga ng giyera sa pagitan ng United States, Israel, at Iran, at kung ano ang masamang epekto nito sa taumbayan at kung paano ito reresolbahin ng gobyerno.
Ayon naman kay Quimbo, “the joint hearings aim to gather critical data and align the House’s legislative response with the Executive’s ongoing efforts, leading to measures that can be rolled out quickly to protect vulnerable sectors. The multi-committee body is also expected to explore targeted assistance, fiscal support, and structural reforms to reduce the country’s exposure to global oil shocks.”
Dadalo rin bukas ang mga economic managers ng Malakanyang na sina Energy Secretary Sharon Garin, Finance Secretary Frederick Go, Migrant Workers Secretary Hans Leo Cacdac, Economy, Planning and Development Secretary Arsenio Balisacan, Foreign Affairs Secretary Ma. Theresa Lazaro, at Budget Secretary Rolando Toledo upang maglatag ng kasalukuyang polisiya ng pamahalaan.
Imbitado rin sina Energy Regulatory Commission Chairperson Francis Saturnino Juan, National Electrification Administration Administrator Antonio Mariano Almeda, Philippine National Oil Company representative Ma. Cristina Sheila Cabaraban, at PNOC-Exploration Corporation official Atty. Adrian Ferdinand Sugay.
Sa mga chairman ng komite, kabilang sa mga inaasahang dadalo at mangunguna sa pagdinig ay sina Palawan Rep. Jose C. Alvarez (Energy), Quezon Rep. Mark Enverga (Agriculture and Food), Nueva Ecija Rep. Mikaela Angela B. Suansing (Appropriations), Camarines Sur Rep. Tsuyoshi Anthony “Hori” Horibata (Aquaculture and Fisheries Resources), Antique Rep. Antonio B. Legarda Jr. (Economic Affairs), Pangasinan Rep. Maria Rachel J. Arenas (Foreign Affairs), Camarines Sur Rep. Miguel Luis R. Villafuerte (Information and Communications Technology), Cavite Rep. Ramon “Jolo” Revilla III (Labor and Employment), Agimat Party-list Rep. Bryan Revilla (Overseas Workers Affairs), Davao Oriental Rep. Cheeno Miguel D. Almario (Social Services), Mountain Province Rep. Maximo Y. Dalog Jr. (Trade and Industry), at Quezon City Rep. Franz S. Pumaren (Transportation).
Inaasahan din ang pagdalo bukas nina Bureau of Internal Revenue Commissioner Charlito Martin Mendoza, Bureau of Customs Commissioner Ariel Nepomuceno, at National Treasurer Sharon Almanza, pati na ang mga opisyal mula sa Overseas Workers Welfare Administration, Bangko Sentral ng Pilipinas, National Tax Research Center, World Bank, at Asian Development Bank. (Meliza Maluntag)
