LA UNION- Kalawit ni Kamatayan ang sumalubong sa isang 33-anyos na lalaki matapos bumangga sa road signage ang minamaneho nitong motorsiklo sa Brgy. Amlang, Rosario ng lalawigang ito kagabi, Nobyembre 10.
Ayon sa mga otoridad, ang biktima ay isang mekaniko, may asawa, residente ng naturang bayan.
Minamaneho ng biktima ang kulay pulang Skygo 175 motorcycle at bumibiyahe papuntang hilagang direksyon sa national highway sa naturang lugar.
Pagdating nito sa sharp curve portion ay na-overshoot ang biktima at bumangga ang kanyang motorsiklo sa road signage.
Resulta nito, sumemplang sa kalsada ang motorsiklo kasama ang biktima.
Nagtamo ng severe head injury ang biktima na agad na isinugod sa Rosario District Hospital .
Gayunman, ang biktima ay idineklarang dead-on-arrival ng umatending doktor. Rolando S. Gamoso
