Meralco nakiisa sa Manila LGU vs ‘spaghetti wires’

MANILA, Philippines – MAHIGPIT na pinagbawalan ni Manila Mayor Isko Moreno Domagoso ang anomang kumpanya o service provider na makikabit sa mga linya sa mga poste ng Meralco sa loob ng lungsod ng Maynila nang walang kaukulang permiso sa nasabing electric company.

“All those telcos or any other services na gagamitin ang Meralco, hindi na po kayo pupwedeng magkabit. Simula last week, sinabi ko na ito kay Andres at Engr. Randy. Dati bulag ang Meralco, basta inaprubahan ng City Hall, maglalatag na, at ang gagamiting panangga kapag sinita ng operatives ng Meralco, may permiso kami sa LGU,” ani Domagoso.

“Ngayon, ni-reverse kasi they know better than us. They understand very well kung ano lang dapat ang nakasampay dyan. Ang ginawa ko, as a matter of policy, it is now Meralco who will say yes or no kung kayo ay makakapaglatag sa poste ng Meralco. If it is feasible, I don’t think Meralco will deny your request. If it is not, then we will heed and follow the direction of Meralco,” dagdag pa ng Alkalde.

Ipinahayag ni Domagoso ang nasabing anunsiyo nang magtungo ito ng personal sa isinasagawang pagsasa-ayos ng mga itinuturing na “spaghetti wires” o mga delikado at hindi magandang tingnan na mga wire sa itaas ng poste bilang bahagi ng isang patuloy na inisyatiba ng “anti-urban blight” sa Binondo.

Kasama ng mga opisyal ng Meralco, minarkahan ni Domagoso ang malawakang pagpapatupad ng Executive Order No. 5 sa isang kaganapan sa Binondo, Maynila noong Miyerkules, Hulyo 9.

Batay sa EO na pinirmahan ni Domagoso, inaatasan ang lahat ng kumpanya ng telekomunikasyon, cable, at kuryente na tanggalin ang mga gusot at inabandunang mga kawad sa itaas sa buong kabisera.

“The least we can do is to be grateful to Meralco na at least may nakikinig sa amin at may tumutugon sa panawagan at request ng taumbayan. Kahit papaano, may 2 million kilos of unnecessary and unutilized, unusable wires,” ani Domagoso.

“Kapag nagtulong-tulong talaga ang private sector at gobyerno, inch by inch, meters by meters and before we know it, we’ve achieved several miles of making the city of Manila pleasant,” dagdag pa ni Domagoso.

Pinasalamatan naman ni Meralco Vice President at Corporate Communications Head Joe Zaldarriaga ang sentimyento ng alkalde, na pinasalamatan si Domagoso sa pagsuporta sa nasabing inisyatiba.

“Gusto namin magpasalamat kay Yorme for supporting us in this endeavor. Malaking bagay kapag kakampi mo ang city hall as we have been saying in the past. Dito, kitang-kita namin ang taos-pusong suporta nila Yorme kaya todo-todo na itong pagkilos natin,” ani Zaldarriaga.

“Hindi natin titigilan ito hangga’t hindi natatanggal ang kahuli-hulihang sakit sa mata na spaghetti wire, tuloy-tuloy itong trabaho natin,” dagdag pa ni Zaldarriaga. JAY Reyes