MANILA, Philippines – Sinabi ni Senador Francis “Chiz” Escudero nitong Huwebes, Oktubre 23 na kailangan ang opinyon ng mga tao sa mga proyektong pang-imprastraktura dahil alam nila ang mga partikular na programa na dapat ipatupad sa kani-kanilang lugar.
“With so many problems in government infrastructure projects coming out, including substandard and ghost flood control projects, we really need to come up with a reasonable solution to save public funds from corruption,” aniya.
Ayon kay Escudero na kadalasan ang mga pang-aabusong ginawa sa mga proyektong pang-imprastraktura ay resulta ng mga arbitraryong hakbang ng mga mambabatas.
At ito ay ginagawa sa pakikipagsabwatan sa mga opisyal sa Executive branch, upang ipakilala ang mga bagay na hindi kailanman pumasa sa pagsisiyasat sa anumang punto ng proseso ng badyet.
Isang solusyon aniya na makakatugon dito ay ang pagtiyak na ang lahat ng mga proyektong pang-imprastraktura ay may naunang pag-endorso ng Regional Development Council, maging ang Provincial Development Council o ang City/Municipal Development Council at ang kani-kanilang Sanggunian bago ang mga ito ay kasama sa National Expenditure Program (NEP) na isinumite ng Pangulo sa Kongreso.
Aniya mapipigil nito ang mga ghost project o mga proyektong pang-imprastraktura na nanggaling sa wala at hindi kasama sa pambansang badyet, aniya.
Ang pagsusuri sa General Appropriations Act (GAA) bago ang 2025, kasabay ng mga pagsusuri na isinagawa ng Commission on Audit, ay magbubunyag ng pagkakaroon ng mga ghost project at iba pang anomalya sa pagpapatupad ng mga proyektong pang-imprastraktura, ipinunto ni Escudero.
Ang mungkahi ni Escudero ay kasama sa panukalang Grassroots Infrastructure Planning and Budgeting bill na kanyang inihain.
Sa ilalim ng panukalang batas, ang paunang pag-endorso ng mga RDC at/o ng mga lokal na namumunong katawan ay isang kinakailangan o kundisyon na sine qua non (ganap na kailangan) para sa pagsasama ng anumang proyektong pang-imprastraktura sa GAA at para sa kasunod na pagpapalabas ng anumang paglalaan para sa pagpapatupad nito.
“Kung walang pag-eendorso o pag-apruba ng RDC, hindi kakailanganin ng Department of Budget and Management (DBM) na maglabas ng pondo para sa anumang proyekto,” aniya. RNT/MND
