ALBAY, Philippines – Ipinag-utos ng lokal na pamahalaan ng Guinobatan sa lalawigan ng Albay ang preemptive evacuation ng mga residente nitong Lunes dahil sa flash flood at lahar flow.
Sinabi ni Mayor Ann Gemma Ongjoco na ang mga residente ng Barangay Masarawag, na matatagpuan sa paanan ng Bulkang Mayon, ay inilikas sa Guinobatan Community College upang matiyak ang kanilang kaligtasan sa gitna ng malakas na pag-ulan dulot ng low-pressure area (LPA) at habagat.
Nagtalaga ng mga clearing team para alisin ang mga debris at volcanic materials na dala ng flash flood bandang alas-3 ng hapon.
Sinabi ni Albay 3rd District Rep. Joey Salceda na inihanda ang mga food packs at mobile kitchen para sa mga apektadong residente sa mga evacuation center.
Pinayuhan din ni Gob. Noel Rosal ang iba pang opisyal ng barangay na maghanda para sa mga posibleng paglikas sa mga komunidad na nalantad sa pagbaha, lahar, at pagguho ng lupa.
Pinaalalahanan niya ang publiko na iwasan ang pagtawid sa mga ilog at iwasan ang hindi kinakailangang paglalakbay sa mga kalsadang madalas bahain at malapit sa tabing-ilog. RNT/MND
