MANILA, Philippines – Ipinahayag ng mga senador nitong Martes ang matinding pagkadismaya matapos kumpirmahin ng Department of Justice (DOJ) na hindi na nasa kustodiya ng Czech authorities si dating kongresista Elizaldy “Zaldy” Co, na may kaugnayan sa imbestigasyon sa flood control corruption scandal.
Ayon kay Senate President Pro Tempore at Blue Ribbon Committee chair Sen. Panfilo “Ping” Lacson, isa itong “lost opportunity” at nakakahiya para sa pamahalaan.
“Simply put, it was a lost opportunity and our government has nobody to blame except itself,” ani Lacson, sabay giit na dapat ay kumilos agad ang gobyerno matapos makatanggap ng impormasyon tungkol sa pagkakaaresto kay Co.
Dagdag niya, “Government must now exert extra effort and work double time to bring him back… to show its sincerity and seriousness in bringing Co and his co-conspirators to justice.”
Parehong sentimyento ang ibinahagi ni Sen. JV Ejercito, na nagsabing malaking “setback” ito sa imbestigasyon.
“At first we were excited… because he is considered as one of the main proponents of the flood gate corruption scandal. So of course, it feels like a big blow setback when what we expected is gone,” ani Ejercito.
Umaasa siya na makakabalik si Co sa bansa upang makapagbigay ng impormasyon tungkol sa umano’y anomalya.
“I hope he comes back… We really should know. Whoever is involved in this, the people should know,” dagdag niya.
Ayon sa mga ulat, si Co ay pinalaya at kasalukuyang “free” at nasa loob ng Schengen area, kahit may arrest warrant na laban sa kanya kaugnay ng umano’y anomalous flood control projects.
Iminungkahi rin ng ilang senador na gamitin ng pamahalaan ang Interpol at red notice system, pati na rin siguraduhing makansela ang lahat ng passport ni Co upang mapigilan ang kanyang paggalaw sa ibang bansa.
Tinawag pa ni Sen. Sherwin Gatchalian ang insidente na isang “temporary setback,” ngunit iginiit na mahalagang mapanagot si Co dahil sa laki ng kasong kinakaharap nito. RNT/MND
