MANILA, Philippines – Nagpapatupad ang pamahalaan ng Pilipinas ng limitasyon sa paggalaw ng presyo ng langis upang maiwasan ang profiteering sa gitna ng umiiral na energy emergency, ayon kay Energy Secretary Sharon Garin.
Nilinaw ni Garin na hindi direktang price control ang ipinatutupad, kundi limitasyon sa taas at baba ng price adjustments.
“We are not capping the price, but we are capping the adjustments,” ani Garin.
Sa ilalim ng polisiya, nagtatakda ang Department of Energy (DOE) ng minimum rollback at maximum price increase, at kinakailangang sumunod ang mga kumpanya o magbigay ng paliwanag batay sa foreign exchange, insurance, at transport costs.
Epektibo nitong Martes, ipinatupad ang rollback na P24.94 kada litro para sa diesel, P3.41 kada litro para sa gasolina, at P2 kada litro para sa kerosene. Ito na ang ikalawang sunod na linggo ng bawas-presyo sa gitna ng pabago-bagong galaw ng pandaigdigang merkado ng langis na apektado ng tensyon sa Middle East.
Ayon kay Garin, maaaring magdagdag ang mga kumpanya sa adjustment ngunit hindi maaaring bumaba sa itinakdang rollback.
“The rollback is now mandated by government. They can add more, but they cannot roll back less than the prescribed number,” aniya.
Nagbabala rin siya na maaaring patawan ng parusa ang mga lalabag, kabilang ang posibleng pagsusuri ng DOE sa kanilang permit.
Samantala, sinabi ni Pangulong Ferdinand Marcos Jr. na patuloy na nagpapatupad ang pamahalaan ng mga hakbang upang maibsan ang epekto ng pabago-bagong presyo ng langis sa mamamayan, at patuloy din ang pag-aaral ng mga karagdagang solusyon.
Sa inspeksyon ng Service Contracting Program ng Department of Transportation, binigyang-diin ng Pangulo ang mabilis na pagbabago ng sitwasyon sa Middle East na pangunahing nakaaapekto sa presyo ng langis.
“The difficult thing about our situation today is that it changes every day,” ani Marcos, kaugnay ng tensyon sa rehiyon kabilang ang usapin sa Strait of Hormuz.
Idinagdag niya na tuloy-tuloy ang pagtukoy ng pamahalaan sa mga hakbang upang mapagaan ang pasanin ng publiko.
Ang Service Contracting Program, sa ilalim ng Public Utility Vehicle Modernization Program, ay nagbibigay ng subsidiya sa mga tsuper batay sa kilometrong tinatakbo, sa halip na bilang ng pasahero, upang mapatatag ang kita at mapahusay ang pampublikong transportasyon. Dave Baluyot
