Ininspeksyon nina MMDA Chairman Atty. Don Artes at San Juan City Mayor Francis Zamora ang pagsasagawa ng Bayanihan sa Estero program sa Lambingan Bridge, San Juan River, sa San Juan City. DANNY QUERUBIN
MANILA, Philippines – Inamin ng Metropolitan Manila Development Authority (MMDA) na nananatiling malaking hamon ang waste management sa Metro Manila.
Ayon kay MMDA General Manager Nicolas Torre III, “Sa Metro Manila, talagang nakikita natin na malaking challenge ang waste management natin.”
Ginawa niya ang pahayag habang ikaatlong araw na ng paglilinis ng MMDA sa Redemptorist Water Channel sa Baclaran, kung saan naipon ang malaking dami ng basura matapos ang ilang araw ng malalakas na pag-ulan.
Gumagamit ang MMDA ng trash skimmer, mabibigat na kagamitan, at mga trak upang alisin at hakutin ang mga nakolektang basura. Hindi pa matiyak ng ahensya ang kabuuang dami ng basurang nakuha, ngunit inaasahang malalaman ito matapos ang opisyal na bilang.
Tinatayang matatapos ang paglilinis sa loob ng ilang araw, ngunit wala pang eksaktong petsa.
Binigyang-diin ni Torre na hindi sapat ang paglilinis lamang kung patuloy pa rin ang maling pagtatapon ng basura.
Aniya, “Walang mangyayari, walang kuwenta kung lilinisin natin, pagkatapos, ganoon pa rin ang mangyayari [sa pagtatapon ng basura].”
Samantala, binisita ni Pangulong Ferdinand “Bongbong” Marcos Jr. ang mga operasyon ng dredging at paglilinis ng drainage sa Las Piñas, at sinabi niyang may pag-unlad na sa pagpigil sa pagbaha ngunit kailangan pa ng mas maraming hakbang.
Noong Sabado, nanawagan din si Ombudsman Jesus Crispin Remulla sa mga alkalde ng Metro Manila na suriin ang posibleng korapsyon sa mga kontrata sa pangongolekta ng basura at waste management. RNT/MDS
