MANILA, Philippines – Arestado ng mga operatiba ng Police Regional Office 5 (PRO-5) ang isang most wanted person ng Department of the Interior and Local Government (DILG) na nahaharap sa kasong murder sa isinagawang manhunt operation sa Rapu-Rapu, Albay nitong weekend.
Kinilala ni PRO-5 Director Brig. Gen. Nestor Babagay Jr. ang suspek na si “Batista,” 38-anyos, mangingisda, tubong Malolos City, Bulacan, at residente ng Bacon District, Sorsogon City.
May nakalaang ₱135,000 pabuya sa pagkakaaresto ng naturang suspek.
Pinuri ni Babagay ang mga operatiba sa matagumpay na operasyon at sa kanilang patuloy na koordinasyon upang maaresto ang mga pugante sa rehiyon.
“This arrest is proof of our tireless commitment to bring criminals to justice through sustained, intelligence-driven, and coordinated police operations,” ani Babagay.
Dagdag pa niya, magpapatuloy ang pagpapatupad ng Enhanced Managing Police Operations upang matunton at maaresto ang iba pang wanted persons na nagtatago sa rehiyon. RNT/JGC
