MANILA, Philippines – Mahigit 1.3 milyong aplikante na ang natanggap ng Commission on Elections (Comelec) para sa 2026 Barangay at Sangguniang Kabataan elections (BSKE).
Sa datos na ibinahagi ng Comelec, noong January 18, 2026, kabuuang 1,356,410 indibidwal ang nakarehistro para makaboto para sa 2026 BSKE kung saan 718,457 ay babae at 637,943 ang mga lalaki.
Mula sa kabuuang registrants 1,028,835 ang regular na botante na edad 18 pataas at 327,575 ay Sangguniang Kabataan (SK).
Ang mga bagong SK registrants ay nasa 322,402. May kabuuang 1,152 ang nag-apply para ilipat mula sa ibang lungsod o munisipalidad at 384 ang hiniling na ilipat sa loob ng parehong lungsod o munisipalidad.
Samantala ang mga aplikasyon para sa mga bagong regular na botante, ay nasa 367,859 habang ang mga nag-aplay para sa muling pagsasaaktibo ay umabot sa 13,174.
Samantala, iniulat ng Region IV-A (Calabarzon) ang pinakamataas na bilang ng mga aplikante na may 271,033.
Sinundan ito ng Region III (Central Luzon) na may 159,473 at National Capital Region (NCR) na may 157,421.
May kabuuang 2,186 na nagparehistro ang nag-apply sa Special Register Anywhere Program (SRAP) site sa Comelec main office sa Intramuros, Manila.
Ang pagpaparehistro ng botante sa buong bansa para sa 2026 BSKE ay ipinagpatuloy noong Oktubre 20, 2025. Ito ay tatakbo hanggang Mayo 18, 2026.
Exempted sa panahon ng pagpaparehistro ng botante, gayunpaman, ang mga lugar sa Bangsamoro dahil sa pagsuspinde sa kauna-unahang parliamentary election.
Maaaring magparehistro ang mga aplikante mula Lunes hanggang Linggo mula 8 ng umaga hanggang 5 ng hapon sa anumang satellite registration sites o sa kani-kanilang Comelec office ng election officer (OEO), ayon sa poll body.
Ang panahon ng pagpaparehistro ng botante ay mabubuksan din sa lahat ng uri ng aplikasyon kasama na ang mga sumusunod:
– paglilipat ng mga talaan,
– bagong pagpaparehistro,
– pagbabago ng pangalan at katayuan,
– pagwawasto ng mga entry,
– muling pagsasaaktibo ng mga talaan ng pagpaparehistro,
– pagsasama ng mga talaan ng pagpaparehistro, at
– pagbabalik ng pangalan sa listahan ng mga botante.
Nauna nang sinabi ng Comelec na target nitong makapagrehistro ng 1.4 milyong bagong botante para sa 2026 BSKE sa buong buwan na pagpaparehistro sa buong bansa. Jocelyn Tabangcura-Domenden
