OCCIDENTAL MINDORO, Philippines – Natagpuang patay ang isang 35-anyos na lalaki na iniulat na nawawala sa isang lugar sa Santa Cruz, Occidental Mindoro nitong Biyernes ng umaga, Oktubre 30, ayon sa pulisya.
Natagpuan ang bangkay bandang alas-9:30 ng umaga sa Sitio Amnay, Barangay Barahan, matapos umano mamataan ng isang magsasaka ang puting Honda XRM 125 motorcycle ng biktima sa lugar, ayon sa Santa Cruz Municipal Police Station.
Ayon sa mga imbestigador, huling nakitang sakay ng motorsiklo ang lalaki bago ito nawala.
Agad na nagtungo sa lugar ang mga pulis matapos matanggap ang ulat at nakipag-ugnayan sa Provincial Forensic Unit (PFU) upang magsagawa ng crime scene investigation at mangalap at magpreserba ng posibleng ebidensya.
Hindi na nagbigay ng karagdagang detalye ang pulisya tungkol sa mga pangyayari sa pagkamatay ng biktima.
Patuloy ang imbestigasyon upang matukoy ang nangyari, makilala ang mga responsable at mapanagot ang mga ito sa batas.
Hinimok din ng pulisya ang sinumang may impormasyong makatutulong sa imbestigasyon na magsumbong sa pinakamalapit na himpilan ng pulisya o direktang makipag-ugnayan sa Santa Cruz Municipal Police Station. RNT/MDS
