MANILA, Philippines – Sinabi ng National Bureau of Investigation (NBI) na nakapag-access ng 5,000 mobile subscriber identity ang isang lalaking Chinese na umano’y nakitaan ng spy equipment malapit sa gusali ng Commission on Elections (Comelec).
Sinabi ni NBI spokesperson Ferdinand Lavin, sa pamamagitan ng international mobile subscriber identity (IMSI) catcher, ay kumakalap ito ng sensitibong data at impormasyon tulad ng text messages, mobile numbers at tawag mula sa mobile phones.
Aniya, ang range ng IMSI ay sa pagitan ng 500 meters hanggang 3 kilometro.
Sa pagdinig sa Senate Special Committee on Philippine Maritime on Philippine Maritime and Admiralty Zones, sinabi ni Lavin na kinumpirma ng technical intelligence na ang IMSI catcher ay talagang “in full operations.”
Ayon pa kay Lavin, ang sasakyan na lulan ang IMSI ay tumahak sa lugar sa Supreme Court, Department of Justice, Villamor Air Base, Bureau of Internal Revenue at Comelec.
Dagdag pa, humirit sila ng warrant para suriin ang computer data laban sa IMSi catcher upang makumpirma ang ulat.
Sinabi pa ni Lavin na inaanalisa na ang datos na nakuha sa IMSI catcher.
Isinalang na sa inquest proceedings noong Miyerkules ang Chinese national sa Department of Justice (DOJ).
Samantala, nanindigan si Comelec chairperson George Garcia na walang sistema o datos ng halalan ang nakompromiso dahil sa insidente. Jocelyn Tabangcura-Domenden
