MANILA, Philippines – Isinailalim sa preventive suspension si National Food Authority (NFA) Administrator Roderico Bioco at 138 iba pang mga opisyal at empleyado dahil sa hinihinalang kaugnayan ng mga ito sa bentahan ng rice buffer stock.
Ani Agriculture Secretary Francisco Tiu Laurel Jr., ipinag-utos ng Office of the Ombudsman ang preventive suspension na ipatutupad sa loob ng anim na buwan.
Sinabi ni Tiu Laurel na siya na muna ang magti-take over sa liderato ng NFA.
Bukod kay Bioco, ilan sa mga opisyal ng NFA na pinatawan ng suspensyon ay sina NFA Assistant Administrator for Operations John Robert Hermano at iba pang regional managers at warehouse supervisors sa buong bansa.
“Kinokondena at hindi palalampasin ang anumang uri ng korapsyon. Kaisa ako ng Ombudsman sa layunin nitong alamin ang katotohanan at parusahan ang dapat maparusahan,” sinabi ni Tiu Laurel. RNT/JGC
