MANILA, Philippines – Ayon sa Department of the Interior and Local Government (DILG) maayos na nasunod ang succession rules sa pagpapalit ng pamumuno sa probinsya ng Nueva Ecija.
Si NE Vice Governor Gil Raymond Umali ang pumalit sa pamumuno ng lalawigan.
Sa isang pahayag, sinabi ng DILG na ang pag-tatakda kay Umali bilang gobernador ng Nueva Ecija ay upang matiyak ang tuluy-tuloy na paghahatid ng serbisyo publiko sa lalawigan kasunod ng pagkakasuspinde ng kanyang nakatatandang kapatid na si Aurelio “Oyie” Umali.
Sinuspinde ng Office of the Ombudsman si Umali ng isang taon dahil sa kasong inihain laban sa kanya dahil sa umano’y pag-iisyu ng mahigit 200 quarry permit na walang clearance mula sa Department of Environment and Natural Resources (DENR).
Sinabi ng DILG na pinadali din nito ang paglipat ng kapangyarihan kay Board Member Eduardo Jose B. Joson VII bilang acting vice governor, bilang unang miyembro ng Sangguniang Panlalawigan.
“The DILG emphasized that its role is to uphold accountability while ensuring continuity of governance. The people’s welfare remains paramount, and services and programs in Nueva Ecija must remain on track despite political transitions,” pahayag ng DILG.
“The law must be respected, and the people must always be served. This is the assurance of the DILG: that accountability will be upheld while ensuring that no Filipino is left behind in the delivery of essential services,” dagdag nito.
Sinabi ng DILG na ang kanilang Central Luzon regional office ay inatasan na i-validate ang katotohanan ng pagpapatupad at kinumpirma ng kanilang ulat na ang suspensyon ay naibigay nang nararapat. RNT/MND
