MANILA, Philippines- Hindi naapektuhan ang serbisyo ng tatlong major telecommunications players ng Pilipinas sa global IT system outage, na nagdulot ng pagkaantala sa lokal na airlines at banking services.
Sa abiso, sinabi ng Globe Telecom Inc. na hindi naapektuhan ang core services nito, kabilang ang call, text, at data connectivity, ng Microsoft system outage.
“The issue was isolated to a few Windows-based workstations that our employees use for work for the most part and some servers that do not materially affect our core services,” pahayag ni Anton Bonifacio, Globe chief information security officer.
Inihayag naman ng PLDT-Smart na hindi ito gumagamit ng “any software from CrowdStrike in its ecosystem, thus our operations remain unaffected by the current outage.”
Sinabi ni DITO Telecommunity’s chief technology officer Rodolfo Santiago na “DITO was not affected by the Microsoft outage.”
Sa Pilipinas, naiulat ng ilang bangko ang technical issues na nagresulta sa mahirap na pag-access sa digital banking services.
Tinamaan din ang major budget carriers Cebu Pacific at AirAsia Philippines ng Microsoft global outage, na nagdulot ng flight delays, nagresulta sa mas mahabang pila at pagsisikip sa mga paliparan.
Naiulat ng airlines, media companies, mga bangko, at telecom firms sa buong mundo na nakaantala ang system outages sa kanilang operasyon.
Inilahad ni Department of Information and Communications Technology Assistant Secretary at spokesperson Renato Paraiso na hindi hacking o cyberattack ang mitsa ng global IT system outage.
“Hindi siya hacking, hindi siya cyberattack. It’s a faulty update,” giit ni Paraiso.
Batay sa US cybersecurity company CrowdStrike sa mga kliyente nito, ang ginagamiit nitong “Falcon Sensor” software ay nagresulta sa pag-crash ng Microsoft Windows at pag-display ng blue screen, kilala bilang “Blue Screen of Death.”
Ibinahagi rin nito ang manual workaround sa pagresolba sa isyu. RNT/SA
