P1.36M ‘tobats’ nasabat sa 3 HVI sa Pasay

MANILA, Philippines – Arestado ng mga operatiba ng District Drug Enforcement Unit ng Southern Police District (DDEU-SPD) ang tatlong high value individuals (HVI) na nakumpiskahan ng kabuuang 200 gramo ng shabu sa ikinasang buy-bust operation sa Pasay City, Lunes ng gabi, Hulyo 7.

Kinilala ni SPD Director P/Brig. Gen. Randy Arceo ang mga nadakip na suspek na sina alyas Tol, 25; alyas Gertrics, 34; at isang alyas Samad, 38.

Base sa report na natanggap ni Arceo, naganap ang pagdakip sa tatlong suspek dakong alas-7:45 ng gabi sa kahabaan ng Petunia Street, Rivera Village, NAIA, Barangay 199, Pasay City.

Sa isinagawang operasyon ay nakumpiska sa posesyon ni alyas Tol ang 50 gramo ng shabu, habang sina alyas Gertrics at alyas Samad naman ay nakuhanan ng 100 gramo at 50 gramo ng hinihinalang shabu, ayon sa pagkakasunod-sunod, kung saan may kabuuan itong 200 gramo na nagkakahalaga ng P1,360,000.

Bukod sa ilegal na droga ay narekober din sa mga suspek ang P1,000 marked buy-bust money, kasama ang isang bugkos ng tig-P1,000 bogus money na ginamit sa naturang operasyon.

Kasalukuyang nasa kustodiya ng DDEU-SPD para sa dokumentasyon at pagproseso sa pagsasampa ng kaso laban sa mga suspek na nahaharap sa kasong paglabag sa Sections 5 at 11, Article II ng Republic Act 9165 (Comprehensive Dangerous Drugs Act of 2002).

“This operation is a concrete example of what it means to be swift, precise, and intelligence-driven in our law enforcement duties. I commend our DDEU operatives and partner units for their outstanding coordination and execution. As aligned with the directives of our Chief, PNP, Police General Nicolas D. Torre III, we will continue to lead with urgency and consistency in our anti-criminality efforts. Every arrest we make is a step closer to our goal of a safer, drug-free Southern Metro,” ani Arceo.
(James I. Catapusan)