P100M ismagel na agri products nasabat ng BOC sa Subic

MANILA, Philippines – TINATAYANG nasa P100 milyon halaga ng mga ismagel na karot, sibuyas at mga frozen mackerel ang nadsikubre ng mga tauhan ng Bureau of Customs (BOC), kasama ang Department of Agriculture (DA) at Subic Bay Metropolitan Authority (SBMA) sa isinagawang magkasanib na inspeksyon sa Port of Subic noong Hulyo 8, 2025.

Ayon sa BOC-Port of Subic, nadiskubre sa isinagawang inspeksyon ang mga misdeclared agricultural products sa sampung 40-foot containers na unang idineklara na naglalaman ng “Chicken Lollipops” o “Chicken Poppers”.

Nabatid sa BOC na may kabuuang 52 container ang na-flag ng BOC para sa karagdagang inspeksyon, at pagkatapos ng malawakang pagsusuri at clearance ng DA, 21 container ang nailabas. Gayunpaman, 31 container ang nananatili sa ilalim ng customs custody, kabilang ang 10 containers na tinatayang may hawak na agricultural goods na nagkakahalaga ng P100 milyon.

Dahil dito, mag-iisyu ang Port of Subic ng Warrants of Seizure and Detention (WSD) laban sa mga nasabing kargamento dahil sa paglabag sa Section 19 ng DA Circular No. 4, s. 2016; Sections 7(c) at 7(e) ng Anti-Agricultural Economic Sabotage Act; Section 1400, at Section 1113(f) at (l)(3), (4), at (5) ng Customs Modernization and Tariff Act (CMTA); at Section 61(d) ng Republic Act (RA) No. 8550, na inamyendahan ng RA 10654, at ng Fisheries Administrative Order 195 s. 1999.

Inatasan naman ni Commissioner Nepomuceno ang mga kaukulang tanggapan sa loob ng BOC na tukuyin at ihain ang mga kaukulang kaso laban sa mga indibidwal na responsable sa nabanggit na ilegal na aktibidad. JAY Reyes