MANILA, Philippines — Nagbigay ang European Union (EU) ng €450,000 (mga PHP30.69 milyon) na tulong para sa mga komunidad na naapektuhan ng magkakasunod na lindol sa Davao Oriental noong Oktubre 10, 2025.
Sa kabuuang halaga, €300,000 (PHP20.46 milyon) ay mapupunta sa ACCESS consortium na pinamumunuan ng CARE para sa mga proyekto sa pabahay, tubig, at sanitasyon. Ang natitirang €150,000 (PHP10.23 milyon) ay ilalaan sa Philippine Red Cross para sa pamamahagi ng mga tolda, sleeping kits, kitchen sets, at iba pang pangunahing pangangailangan sa mga pinalikas na pamilya.
Saklaw din ng tulong ang cash assistance, mainit na pagkain, malinis na tubig, serbisyong pangkalusugan, at pagtatayo ng ligtas na lugar para sa mga bata. Bahagi ito ng kontribusyon ng EU sa Disaster Response Emergency Fund ng International Federation of Red Cross and Red Crescent Societies (IFRC).
Sa huling tulong na ito, umabot na sa €8.05 milyon (PHP549 milyon) ang kabuuang humanitarian aid at pondo para sa paghahanda sa sakuna ng EU para sa Pilipinas sa 2025, kasama na ang mga nakaraang tulong sa mga bagyo at lindol.
Patuloy na nagbibigay ang EU, sa pamamagitan ng European Civil Protection and Humanitarian Aid Operations (ECHO), ng agarang tulong at suporta sa mga mahihinang sektor sa buong mundo. RNT
