MANILA, Philippines – NASA kabuuang P42.6 milyon ang pondong inilabas ng lokal na pamahalaang Lungsod ng Maynila alinsunod sa direktiba ni Mayor Francisco “Isko” Moreno Domagoso, upang maipagkaloob na ang matagal nang naantalang benepisyo para sa 92 retiradong empleyado ng lungsod.
Sa isinagawang flag-raising ceremony ng Pamahalaang Lungsod noong Lunes, Enero 12, sinabi ni Domagoso na ang pagpapalabas ng benepisyo ay pagtupad sa pangakong ayusin at bayaran ang mga matagal nang obligasyon ng lungsod sa kabila ng mahigpit na kalagayang pinansyal nito.
Ayon kay Yorme, saklaw ng naturang pagpapalabas ng benepisyo ang mga retiradong kawani na may haba ng serbisyo mula halos dalawang dekada hanggang mahigit apat na dekada.
“I will give what is due to you,” ayon sa alkalde.
Iba-iba ang halagang natanggap ng mga retirado batay sa haba ng kanilang serbisyo at mga naipong benepisyo, kung saan may ilan na tumanggap ng higit sa ₱2 milyon.
Inihanda ng City Treasurer’s Office ang mga tseke at agad ding ipinamahagi sa mismong araw na iyon.
Kinilala ni Domagoso na may ilang retirado na naghintay ng maraming taon bago matanggap ang kanilang benepisyo, at sinabi niyang ang ganitong mga pagkaantala ay nakasisira sa tiwala sa pamahalaan at nagpapahina sa moral ng mga kawani ng lungsod.
Ayon pa sa alkalde, isinulong ng administrasyon ang pagproseso ng mga claim bilang bahagi ng mas malawak na hakbang upang maibalik ang kaayusan sa pananalapi ng lungsod.
“Sa inyong lahat na nasa harapan namin, na kapwa naming naglingkod sa bayan: Maraming, maraming salamat sa paglilingkod sa kapwa,” ani Domagoso.
Binanggit din ng alkalde ang kaso ng pinakamatagal na naglingkod na retirado na kinilala sa seremonya—si Roman Bandin ng City General Services Office—na may 44 na taon at siyam na buwang serbisyo bago magretiro noong Pebrero 2024.
Ayon sa kanya, ang naturang tagal ng serbisyo ay paalala ng mga sakripisyong ginawa ng mga rank-and-file na kawani ng pamahalaan.
Sinabi ni Domagoso na naisakatuparan ang pagpapalabas ng benepisyo kahit patuloy na hinaharap ng lungsod ang mga minanang obligasyon at patuloy na kakulangan sa badyet. Dagdag pa niya, isinasagawa ng administrasyon ang maayos na pagsasaayos ng iskedyul ng pagbabayad upang maiwasan ang paglikha ng panibagong pagkakautang habang unti-unting binabayaran ang mga dating obligasyon.
“Kahit na tayo’y gipit na gipit, pipilitin kong iraos ang ating lungsod, partikular ang ating mamamayan,” ani ng alkalde.
Nanawagan din ang alkalde sa mga kawani ng lungsod na panatilihin ang propesyonalismo sa pakikitungo sa mga taxpayer, binibigyang-diin na ang pagbangon ng pananalapi ng lungsod ay nakasalalay hindi lamang sa koleksyon ng buwis kundi pati sa kalidad ng serbisyo at tiwala ng publiko.
“Unawain natin ang ating mga taxpayer. Give them special attention. Make them feel that worth every penny ang binibigay nila,” ani Domagoso. JAY Reyes
