MANILA, Philippines – Epektibo ngayong Sabado, Setyembre 26 ang P60 dagdag-sahod sa mga minimum wage earner sa National Capital Region (NCR) sa ilalim ng Wage Order No. NCR-28.
Dahil dito, magiging P755 kada araw ang minimum wage ng mga non-agricultural worker mula sa dating P695. Samantala, magiging P718 naman mula P658 ang sahod ng agricultural workers, gayundin ng mga manggagawa sa maliliit na retail at service establishments at manufacturing firms na sakop ng mas mababang rate.
Ayon sa Department of Labor and Employment (DOLE), tinatayang 1.1 milyong daily wage earners sa Metro Manila ang makikinabang sa dagdag-sahod.
Pinag-utos din ng DOLE sa mga employer na sundin ang bagong wage rates at tiniyak na imo-monitor nito ang pagpapatupad ng wage order.
Ang Wage Order No. NCR-28 ay inilabas habang nananatiling nakabinbin ang legal na usapin sa naunang Wage Order No. NCR-27 na naglaan ng kabuuang P85 dagdag-sahod sa dalawang tranche. RNT/MDS
