MANILA, Philippines – Pinagpawisan ng husto ang maalamat na si Manny Pacquiao noong Miyerkules ng hapon, July 24, sa kanyang paghahanda sa exhibition bout kontra Japanese Rukiya Anpo sa Linggo, July 28, sa Saitama Super Arena.
Dumating si Pacquaio sa Japan kasama ang kanyang asawa na si Jinkee, at mga anak noong Martes, Hulyo 23.
Sa kabila na ang laban ay itinakda sa catchweight na 152 pounds sa loob lamang ng tatlong round, si Pacquiao ay nagsanay sa loob at labas ng dalawang buwan sa General Santos City.
Sa kanyang workout sa gabay ni head trainer na si Buboy Fernandez sa Kyokuto Gym sa Tokyo, ibinandera ni Pacquiao ang bilis at lakas na naging dahilan kaya siya itinuring na tanging eight-division world champion ng boxing.
Haharapin ni Pacquiao ang kanyang pinakamataas na kalaban sa 6-foot na si Anpo, isang 28-anyos na dating K-1 super lightweight champion at ang 2021 K-1 welterweight Gran Prix runner-up.
Si Anpo, na nagsanay ng karate bago nag-concentrate sa kickboxing, ay mas matangkad ng isang pulgada kaysa kay Antonio Margarito, na tinalo ni Pacquiao para sa World Boxing Council (WBC) super welterweight crown noong 2010 sa Arlington, Texas.
Sinabi ni Plas Fernandez, na tumutulong sa kanyang nakatatandang kapatid na si Buboy sa paghahanda ng dating senador sa kanyang pagbabalik sa ring, na magsasagawa pa rin si Pacquiao ng light workout.
Ngayon ay 45 taong gulang na, nagretiro si Pacquiao noong Agosto 2021 matapos matalo sa pamamagitan ng unanimous decision kay Yordenis Ugas.
Huling lumaban si Pacquiao sa ring noong Disyembre 2022 nang talunin niya ang South Korean martial artist na si DK Yoo sa pamamagitan ng isang lopsided unanimous decision.JC
