MANILA, Philippines — Sinabi nina La Union 1st District Rep. Paolo Ortega V at Zambales 1st District Rep. Jay Khonghun na maaaring magdulot ng hinala sa publiko ang patuloy na hindi pagdalo ni Vice President Sara Duterte sa kanyang impeachment trial.
Ayon kay Ortega, natural lamang na isipin ng publiko at ng mga senator-judges na may itinatago ang Bise Presidente kung patuloy itong hindi haharap sa pagdinig.
“That is the natural and logical impression or conclusion people and senator-judges would have if the Vice President remains adamant in not attending her trial,” aniya.
Reaksyon ito ng dalawang mambabatas sa resulta ng pinakahuling Social Weather Stations (SWS) survey na nagsabing 70 porsiyento ng mga Pilipino ang nais na sagutin ni Duterte ang mga kasong kinahaharap niya sa impeachment trial.
Sinabi naman ni Khonghun na kung magpapatuloy ang pagliban ni Duterte, maaaring mabigo ang publiko.
“This sentiment has been consistent and overwhelming. The people will get frustrated with the Vice President if she continues to obstinately refuse to heed their clamor,” saad ni Khonghun.
“Ang patuloy na pag-deadma niya sa malakas na panawagan ng taong bayan ay mangangahulugan o magpapakita ng kanyang mistulang kasalanan,” giit naman ni Ortega.
Samantala, inihalintulad ni Khonghun ang sitwasyon ng Bise Presidente sa isang akusadong umiiwas sa pananagutan.
“Lawyers often say that flight may be indicative of guilt. In this case, continued avoidance of the impeachment trial could be viewed in much the same way,” aniya.
“Kung wala kang tinatago, bakit ayaw mong humarap sa trial?” dagdag pa niya.
Sa kasalukuyan, wala pa ring personal na pagdalo si Duterte sa siyam na araw ng impeachment trial. Ayon sa Office of the Vice President, nasa biyahe siya sa Qatar, United Kingdom, at Netherlands mula Hulyo 16 hanggang 31. RNT/MDS
