IPINAHAYAG ng Civil Aviation Authority of the Philippines (CAAP) na hindi bababa sa pito hanggang sampung porsiyentong pagtaas sa dami ng pasahero sa himpapawid ang inaasahan sa “Undas” kumpara sa nakaraang taon.
Nabatid na ang CAAP ay nagpapatakbo ng 44 na paliparan, na mayroong 2.1 milyong pasahero mula Oktubre hanggang Nobyembre 2023.
Sa inaasahang pagdagsa, sinabi ng CAAP na ang lahat ng airport manager ay inatasan na tiyakin ang tuluy-tuloy na operasyon, at idinagdag na ang kaligtasan at seguridad ng mga pasahero ang pangunahing prayoridad kung saan nakalagay ang mga help desk at naka-standby ang mga security at medical team.
Hinimok ng CAAP ang mga pasahero na sumunod sa mga patakaran at iwasang magdala ng mga ipinagbabawal na bagay. Pinaalalahanan din nito ang mga pasahero na mahigpit na ipinagbabawal ang bomb jokes.
Hinihikayat din ang mga pasahero na dumating sa paliparan nang hindi bababa sa tatlong oras bago ang kanilang iskedyul, at makipag-ugnayan sa mga airline.
Hinimok naman ng bagong operator ng paliparan, ang New NAIA Infra Corp. (NNIC), ang mga airline na buksan nang maaga ang kanilang mga check-in counter upang mabawasan ang panahon ng pagpila sa mga peak hours.
Sinabi ng NNIC na mas maraming parking space ang magbubukas sa Terminal 3, at idinagdag na ito ay nakikipag-usap sa mga provider ng transportasyon upang madagdagan ang availability ng sasakyan.
Samantala, nabatid na ipapakalat ang karagdagang tauhan at seguridad sa Ninoy Aquino International Airport (NAIA).
Humigit-kumulang 100 pang Philippine National Police Aviation Security Unit (AVSEU) personnel sa NAIA ang ipapakalat upang suportahan ang mobile patrol at police visibility sa loob at labas ng mga airport terminal.
Iaaktibo naman 24/7 ng Office for Transportation Security (OTS) ang Transportation Security Operations Center nito upang tulungan ang mga pasahero sa mga alalahanin sa seguridad at para sa napapanahong pag-uulat ng mga insidente.
Kaugnay nito, Ang Bureau of Immigration (BI) naman ay magdedeploy ng karagdagang tauhan sa international na mga paliparan at daungan para sa ‘Undas’ exodus.
Sinabi ni Immigration Commissioner Joel Anthony Viado na ang 58 bagong immigration officers (IOS) na inaasahang gagraduate sa Martes ay magpapalaki sa manpower ng bureau para sa obserbasyon.
Binanggit naman ni BI spokesperson Dana Sandoval na “full manpower complement” ang ipapatupad ngayong weekend sa mga immigration counter sa paliparan para pagsilbihan ang mga paparating at papaalis na mga pasahero.
Mayroong higit sa 3,000 BI personnel sa buong bansa, humigit-kumulang 1,800 dito ay namamahala sa mga internasyonal na paliparan at daungan.
