MANILA, Philippines – Humiling sa Korte Suprema si Veronica “Kitty” Duterte, sa pamamagitan ng kanyang mga abogado, na resolbahin ang kanyang nakabinbing petisyon para sa agarang pagbabalik ng kanyang ama na si dating Pangulong Rodrigo Duterte.
Sa isang pahayag, sinabi ng abogado ng nakababatang Duterte na si Salvador Paolo Panelo, Jr. na naghain sila ng urgent motion upang resolbahin at upang idirekta ang mga respondent na opisyal ng gobyerno ng Pilipinas upang mapadali ang pagbabalik ng dating Pangulo.
Sinabi ni Panelo na binigyang-diin ng mosyon ang malubhang kahihinatnan ng “pangmatagalang katahimikan” ng Korte Suprema sa mga petisyon laban sa pag-aresto at paglipat ni Digong Duterte sa International Criminal Court.
Aniya, maaaring maulit ang paglipat ng dating Pangulo noong Marso 11 kasunod ng mga ulat na naglabas na rin ng warrant of arrest laban kay Senador Ronald Dela Rosa.
“The Motion urges the Supreme Court to finally resolve the petitions to prevent further deterioration of FPRRD’s health, or his undignified death in foreign custody; to hold accountable those responsible for his illegal abduction and surrender to the ICC; and to forestall further violations of liberty without due process of law, including the imminent threat of repeat abuses against Senator Ronald ‘Bato’ dela Rosa,” ayon kay Panelo.
Binanggit ni Panelo ang jurisprudence ng Amerika at Pilipinas sa mga petisyon ng habeas corpus, Noem vs. Abrego Garcia at Villavicencio vs. Lukban, na tumatalakay sa isyu ng hurisdiksyon ng Korte Suprema ng Amerika at Pilipinas.
Binanggit din sa mosyon ang matagumpay na pagsisikap ng gobyerno ng Pilipinas na maibalik sa Timor-Leste si dating kongresista Arnolfo Teves, Jr.
“We respectfully urge the Supreme Court to act promptly to provide relief and guidance to reaffirm the Rule of Law, and ensure that blatant violations of fundamental rights are not unremedied and unpunished under its watch,” aniya. RNT/MND
