NOONG ika-24 ng Abril 2024 ang kauna-unahang dayalogo sa pagitan ng Philippine Coast Guard Human Resource Management Command (CGHRMC) at Home Development Mutual Fund o mas kilala bilang PAG-IBIG Fund sa CGHRMC Coast Guard Base sa Taguig city.
Personal na dumalo sa nasabing pag-uusap si Pag-IBIG Fund Deputy Chief Executive Officer na si Auxiliary Commodore Alexander Hilario Aguilar na isa ring miyembro ng Philippine Coast Guard Auxiliary (PCGA) Executive Squadron. Kasama niya si Auxiliary Rear Admiral Hilda Ong, Chairperson ng Committee on Communications and Advocacy ng CGHRMC Multi-Sector Governance Council.
Isinagawa ang pagkilala at pagtatanong ni CGHRMC CG Rear Admiral Rommel Supangan ang ukol sa mga benepisyo at mga programa para sa miyembro ng Pag-IBIG kaya sinimulan na ni DCEO Aguilar ang pagtalakay sa kung ano ba ang mandato ng HDMF/Pag-IBIG Fund alinsunod sa Republic Act No. 9679 at sa “Bagong Pilipinas” na inisyatiba ni President Ferdinand “BBM” Marcos, Jr.
Nitong Abril 3, 2025, bilang bahagi ng patuloy na pagpapalakas ng ugnayan sa pagitan ng mga ahensya ng pamahalaan at upang higit pang mailapit ang mga benepisyo ng Pag-IBIG Fund sa mga unipormadong kawani, bumisita si Pag-IBIG Fund Chief Executive Officer Marilene C. Acosta sa punong himpilan ng Philippine Coast Guard (PCG) sa Port Area, Maynila kamakailan upang magbigay-galang kay Commandant Admiral Ronnie Gil Gavan at sa matataas na opisyal ng PCG. Kasama ni CEO Acosta si PCGA Auxiliary Commodore at Deputy CEO Alexander G. Aguilar para sa Marketing, Product Development, and Sales Cluster.
Sa naturang pagpupulong, ibinahagi ni CEO Acosta ang iba’t ibang programa ng Pag-IBIG Fund na makikinabang ang mahigit 34,000 kawani ng PCG sa buong bansa. Kabilang dito ang Pag-IBIG Housing Loan Program, ang Modified Pag-IBIG 2 (MP2) Savings Program, ang 4PH (Pambansang Pabahay Para sa Pilipino Program), Acquired Assets Group Sale, at ang Pag-IBIG Loyalty Card Plus.
“Laging handa ang Pag-IBIG Fund na ilapit ang aming mga programa at serbisyo sa ating kapwa lingkod-bayan,” ani CEO Acosta.
“Inaasahan naming matulungan ang magigiting na kalalakihan at kababaihan ng Philippine Coast Guard sa pagtamo ng kanilang mga benepisyo mula sa Pag-IBIG Fund, upang matugunan ang kanilang pangangailangang pabahay at mapaigting ang kanilang kaalaman sa pananalapi sa pamamagitan ng aming mga savings program.”
Ipinahayag naman ni Admiral Gavan ang kahandaan ng PCG na suportahan ang nasabing ugnayan: “Kami ay handang maglaan ng espasyo sa loob ng aming kampo para sa opisina ng Pag-IBIG upang mas madaling makakuha ng serbisyo ang aming mga tauhan.”
Binigyang-diin din niya na ang Pag-IBIG Fund ay may malawak na hanay ng mga benepisyo na kanyang inaasahang mapakikinabangan nang lubos ng mga tauhan ng PCG, at nagpahayag siya ng tiwala na magbubunga ito ng isang matagumpay at pangmatagalang ugnayan sa pagitan ng dalawang institusyon.
